“டிஜிட்டல் இந்தியாவில் இப்படியும் ஒரு அவலமா..?” சாலை வசதி இல்லாததால் நோயாளியைத் தோளில் சுமந்து சென்ற கிராம மக்கள்.. மனதை உலுக்கும் வீடியோ..!!

பீகார் மாநிலம் பாகல்பூர் மாவட்டத்தில் உள்ள ஒரு கிராமத்தில், அடிப்படைச் சாலை வசதியும் மருத்துவக் கட்டமைப்பும் இல்லாத அவல நிலையை வெளிச்சம் போட்டுக் காட்டும் வீடியோ ஒன்று வெளியாகிப் பெரும் அதிர்ச்சியை ஏற்படுத்தியுள்ளது. அந்த வீடியோவில், உடல்நலக்குறைவால் பாதிக்கப்பட்ட பெண் ஒருவரை அப்பகுதி கிராம மக்கள் பாரம்பரிய கயிற்றுக் கட்டிலில் படுக்க வைத்து, தங்களது தோள்களில் சுமந்தபடி மருத்துவமனைக்கு அழைத்துச் செல்லும் காட்சிகள் பதிவாகியுள்ளன.

அந்தக் கிராமத்திற்குச் செல்வதற்கு முறையான தார்ச் சாலை வசதி இல்லாத காரணத்தால், அவசரக் காலங்களில் கூட ஆம்புலன்ஸோ அல்லது வேறு எந்த வாகனமோ கிராமத்திற்குள் நுழைய முடியாத சூழல் நிலவுகிறது. இதனால் வேறு வழியின்றி, தங்களது உயிரைக் காப்பாற்றிக் கொள்ள கிராம மக்களே கயிற்றுக் கட்டிலை ஆம்புலன்ஸாக மாற்றி நோயாளிகளைச் சுமந்து செல்லும் அவல நிலைக்குத் தள்ளப்பட்டுள்ளனர்; இந்த வீடியோ தற்போது இணையத்தில் வைரலாகி நிர்வாகத்தின் அலட்சியத்திற்கு எதிராகக் கடும் விமர்சனங்களை எழுப்பியுள்ளது.