“நான் கர்ப்பமாக இருக்கிறேன், லூசுகளா” நான் வயித்துல கை வச்சது அதுக்குதான்… டிரம்ப் அருகில் நின்ற பெண் கொடுத்த பரபரப்பு பதில்… இணையவாசிகள் ஷாக்..!!

அமெரிக்க அதிபர் டொனால்ட் டிரம்ப் வெள்ளை மாளிகையில் குழந்தைகள் தடுப்பூசி பரிந்துரைகள் தொடர்பான நிர்வாக உத்தரவில் கையெழுத்திடும் நிகழ்வில், அவருக்கு அருகில் நின்றுகொண்டிருந்த பெண் ஒருவரின் வீடியோ சமூக வலைதளங்களில் வைரலானது. அந்த நிகழ்வின் போது, அப்பெண்மணி தனது வயிற்றுக்கு அருகில் கையை வைத்துக்கொண்டு தொடர்ந்து தலை அசைத்துக் கொண்டிருந்தார். இதைப் பார்த்த சில இணையவாதிகள், டிரம்ப் கவனச்சிதறல் அடையும்போதோ அல்லது தூங்க முற்படும்போதோ, அவருக்கு வயிற்றுப் பொத்தான் மூலமாக மின்சார அதிர்ச்சி கொடுத்து விழிப்படையச் செய்ய அப்பெண்மணி மறைமுகக் கருவியைப் பயன்படுத்துகிறார் என்று ஒரு விசித்திரமான சதித்திட்டக் கோட்பாட்டை இணையத்தில் பரப்பி மீம்களாக மாற்றினர்.

இந்த விசித்திரமான வதந்திகள் இணையத்தில் காட்டுத்தீ போலப் பரவிய நிலையில், வீடியோவில் இருந்த பெண்மணி அதற்குப் பதிலளித்துச் சலசலப்பை அடக்கியுள்ளார். அவர் வேறு யாருமல்ல, முன்னாள் டிரம்ப் நிர்வாக ஊழியரும், ‘தி கன்சர்வேடிவ்’ ஊடக அமைப்பின் தலைமைச் செயலதிகாரியுமான ஜெய்மி லீ பிராங்க்ளின் ஆவார். பரவி வந்த பதிவொன்றை மறுபகிர்வு செய்து பதிலளித்த அவர், “நான் கர்ப்பமாக இருக்கிறேன், லூசுகளா!” என்று காட்டமாகத் தெரிவித்து, தான் வயிற்றில் கை வைத்திருந்ததற்கான இயல்பான காரணத்தை விளக்கி வதந்திகளுக்கு முற்றுப்புள்ளி வைத்தார்.

முன்னாள் டிரம்ப் பிரசாரப் பிரிவு மற்றும் ஃபாக்ஸ் நியூஸ் போன்றவற்றில் பணியாற்றிய அனுபவம் கொண்ட ஜெய்மி, வெள்ளை மாளிகையின் இந்த முக்கிய நிகழ்வில் கலந்துகொண்டது கவனம் பெற்றது. அமெரிக்க சுகாதாரத் துறைச் செயலர் ராபர்ட் எஃப். கென்னடி ஜூனியர் உடன் இணைந்து டிரம்ப் குழந்தைகள் தடுப்பூசி அட்டவணையை மறுபரிசீலனை செய்யும் உத்தரவில் கையெழுத்திட்ட அந்த நிகழ்வு, ஏற்கனவே அமெரிக்க மருத்துவ உலகில் பெரும் விவாதத்தைக் கிளப்பியிருந்தது. இந்நிலையில், ஜெய்மியின் கர்ப்ப கால இயல்பான அசைவு இணையவாதிகளின் கற்பனையால் மின்சார அதிர்ச்சி வதந்தியாக மாறி வைரலானது குறிப்பிடத்தக்கது.