“கைரேகை மிஸ் ஆனாலும் தப்ப முடியாது..” மதுரையை உலுக்கிய 15 கிலோ தங்கக் கொள்ளை..! ஏஐ உதவியுடன் குற்றவாளியைத் தேடும் போலீஸ்..!!

தமிழ்நாடு மதுரையில் புதிதாக திறக்கப்பட்ட தனிஷ்க் நகைக்கடையில் கடந்த நவம்பர் 12, 2026 அன்று அதிகாலையில் 15 கிலோவிற்கும் அதிகமான தங்க மற்றும் வைர நகைகள் கொள்ளையடிக்கப்பட்ட சம்பவம் அப்பகுதியில் பெரும் பரபரப்பை ஏற்படுத்தியுள்ளது. இந்த மாபெரும் கொள்ளை வழக்கை விரைந்து துப்பு துலக்க காவல்துறையினர் 9 சிறப்புத் தனிப்படைகளை அமைத்து தீவிர தேடுதல் வேட்டையில் ஈடுபட்டுள்ளனர்.

குற்றவாளிகளின் கைரேகை மற்றும் நேரடி தடயங்களைச் சேகரிப்பதில் சிக்கல் ஏற்பட்டுள்ளதால், குற்றவாளியைக் கண்டுபிடிக்க காவல்துறை தற்போது செயற்கை நுண்ணறிவு தொழில்நுட்பத்தின் உதவியை நாடியுள்ளது. இதன் மூலம், சிசிடிவி காட்சிகளில் பதிவாகியுள்ள சந்தேகத்திற்குரிய நபரின் உடல் அமைப்பு மற்றும் நடமாட்டத்தை அடிப்படையாக வைத்து குற்றவாளியை துல்லியமாக அடையாளம் காணும் முயற்சியில் அதிகாரிகள் தீவிரமாக ஈடுபட்டுள்ளனர்.

விசாரணையின் ஒரு பகுதியாக, கொள்ளை நடப்பதற்கு சில நாட்களுக்கு முன்பு (நவம்பர் 5 அன்று) முகமூடி அணிந்த நபர் ஒருவர் கடைக்கு வந்து நோட்டமிட்டது தெரியவந்துள்ளது. ரயில் நிலையங்கள், சுங்கச்சாவடிகள் மற்றும் முக்கிய சாலைகளில் உள்ள சிசிடிவி கேமராக்களை ஆய்வு செய்து வரும் போலீசார், கொள்ளையன் ஸ்கூட்டியில் வந்துவிட்டு பின்னர் ரயிலில் தப்பியோடியிருக்கக்கூடும் என்ற கோணத்திலும் விசாரணையை முடுக்கிவிட்டுள்ளனர்.