“இப்படி பொய் சொன்னா சாகத்தான் செய்வாய்…!” வருங்கால கணவரை தள்ளிவிட்டு கொன்ற பெண்… சிரிப்பு எமோஜி போட்டு மரணத்தை கேலி செய்த பெண் மருத்துவர்… கடைசியில் காத்திருந்த அதிர்ச்சி..!!

மகாராஷ்டிராவைச் சேர்ந்த பிரபல தொழிலதிபரின் மகனான கேதன் அகர்வால், கடந்த ஜூன் 18 அன்று புனேயில் உள்ள வரலாற்று சிறப்புமிக்க லோஹாகட் கோட்டையில் வைத்து கொடூரமாகக் கொலை செய்யப்பட்டார். கேதனின் நிச்சயதார்த்தப் பெண் சியா கோயல், தனது காதலன் சேத்தன் சௌத்ரியுடன் இணைந்து இந்தச் சதியை அரங்கேற்றியுள்ளார். அவர்கள் கேதனை நயமாகப் பேசி கோட்டையின் உச்சிக்கு வரவழைத்து, அங்கிருந்து ஆழமான பள்ளத்தாக்கில் தள்ளிவிட்டுள்ளனர். இதனை ஒரு கால் தவறி விழுந்த விபத்து போலக் காட்ட அவர்கள் முயன்றபோதிலும், காவல்துறையின் தொழில்நுட்ப ஆதாரங்கள் மற்றும் தீவிர விசாரணையில் இது முன்கூட்டியே தீட்டப்பட்ட கொலைச் சதி என்பது அம்பலமானது. தற்போது சியாவும் அவரது காதலனும் போலீஸ் காவலில் உள்ளனர்.

இந்தக் கொடூரமான கொலை வழக்கு பரபரப்பை ஏற்படுத்திய நிலையில், சமூக ஊடகங்களில் இதைப் பற்றி அவதூறாகவும் உணர்ச்சியற்ற முறையிலும் கருத்துத் தெரிவித்தவர்கள் மீது நடவடிக்கை பாயத் தொடங்கியுள்ளது. அகில இந்திய பல் மருத்துவ மாணவர்கள் மற்றும் அறுவை சிகிச்சை நிபுணர்கள் சங்கத்தின் மத்தியப் பிரதேச மாநிலப் பொருளாளராக இருந்த பெண் பல் மருத்துவர் டாக்டர் முஸ்கான் சோனி, கேதன் அகர்வாலின் மரணத்தைக் கிண்டல் செய்து தனது அதிகாரப்பூர்வ இன்ஸ்டாகிராம் பக்கத்தில் ஒரு பதிவை வெளியிட்டார். அதில் சிரிக்கும் எமோஜிகளைப் பயன்படுத்தி, “இப்படி பொய் சொன்னால் சாகத்தான் செய்வீர்கள்…” என்று கொடூரமாகக் குறிப்பிட்டிருந்தார். ஒரு மருத்துவர் போன்ற பொறுப்பான தொழிலில் இருப்பவர் கொலையைக் கேலி செய்து பதிவிட்டது சமூக வலைத்தளங்களில் பொதுமக்களிடமும் மருத்துவ உலகிலும் கடுமையான கொந்தளிப்பை ஏற்படுத்தியது.

டாக்டர் முஸ்கான் சோனியின் இந்த ஒழுங்கீனமான செயலை அகில இந்திய பல் மருத்துவ மாணவர்கள் மற்றும் அறுவை சிகிச்சை நிபுணர்கள் சங்கம் மிகத் தீவிரமாக எடுத்துக் கொண்டது. சங்கத்தின் நெறிமுறைகளுக்கும் மருத்துவர்களின் மனிதநேயத்திற்கும் எதிராகச் செயல்பட்டதற்காக, டாக்டர் முஸ்கான் சோனியை உடனடியாக 5 ஆண்டுகளுக்குச் சங்கத்தில் இருந்து நீக்கி அதிரடி உத்தரவு பிறப்பித்துள்ளது. இந்த ஐந்து ஆண்டுகாலத் தடையின் போது, அவர் சங்கத்தின் எந்தவொரு அதிகாரப்பூர்வப் பதவியிலும் நீடிக்க முடியாது, முக்கியக் குழுக்களில் செயல்பட முடியாது, எந்தவொரு கூட்டங்கள் அல்லது கருத்தரங்குகளில் பங்கேற்கவோ மற்றும் சங்கத் தேர்தல்களில் போட்டியிடவோ முடியாது என்று அறிவிக்கப்பட்டு அவர் முற்றிலும் தடைப் பட்டியலில் சேர்க்கப்பட்டுள்ளார்.