“அம்மா, அழாதீங்க…” ஜெர்மனியிலிருந்து வந்து பெற்ற தாய்க்கு.. மகள் கொடுத்த தங்கப் பரிசு..! இணையத்தை உலுக்கும் நெகிழ்ச்சி வீடியோ..!!

ஜெர்மனியில் பணிபுரிந்து வரும் வன்ஷிகா என்ற இளம் பெண், தான் வெளிநாட்டில் கடினமாக உழைத்துச் சேமித்த முதல் பணத்தில் தனது தாய்க்கு தங்க நகைகளைப் பரிசாக வழங்கி ஆச்சரியப்படுத்திய நெகிழ்ச்சியான வீடியோ இணையத்தில் வைரலாகி வருகிறது. இன்ஸ்டாகிராமில் பகிரப்பட்ட இந்த வீடியோ, பெற்றோரைப் பெருமைப்படுத்துவதே உண்மையான மகிழ்ச்சி என்பதை உணர்த்தும் வகையில் அமைந்திருப்பதால், குறுகிய காலத்திலேயே 15 மில்லியனுக்கும் அதிகமான பார்வைகளைப் பெற்று மக்களின் இதயங்களை நெகிழ வைத்துள்ளது.

இந்த வீடியோவில், ஜெர்மனியிலிருந்து வீட்டிற்குத் திரும்பிய வன்ஷிகா தனது தாயிடம் இயல்பாகப் பேசிக்கொண்டிருக்கும்போது, விளையாட்டுக்காக அவரிடம் மன்னிப்பு கேட்டு ஜெர்மனியிலிருந்து அவருக்காகப் பரிசு எதுவும் வாங்கி வரவில்லை என்று கூறுகிறார். அதற்கு அவருடைய தாய், “அதனால் என்ன?” என்று பாசத்துடன் கூறுகிறார். ஆனால், அடுத்த கணமே வன்ஷிகா தனது முதுகுக்குப் பின்னால் மறைத்து வைத்திருந்த ஒரு பரிசுப் பெட்டியைத் தாயிடம் நீட்டுகிறார். அதைத் திறந்து பார்த்து அவரது தாய் திகைத்து நிற்கும் போதே, வன்ஷிகா மற்றொரு தங்க நகை பெட்டியையும் அவரிடம் கொடுக்கிறார். இந்த எதிர்பாராத நற்பரிசைக் கண்ட அந்தத் தாய், உணர்ச்சிப் பெருக்கால் ஆனந்தக் கண்ணீர் விட்டு அழத் தொடங்குகிறார். பின்னர் வன்ஷிகா தனது தாயைக் கட்டிப்பிடித்து அணைத்து ஆறுதல் படுத்துகிறார்.

https://www.instagram.com/reel/DakTDoGTfUs/?utm_source=ig_web_button_share_sheet

இந்த நெகிழ்ச்சியான தருணம் குறித்துப் பகிர்ந்துள்ள வன்ஷிகா, நான்கு ஆண்டுகளுக்கு முன்பு தனது கனவுகளைத் துரத்தி ஜெர்மனிக்குச் சென்றதாகவும், தான் உழைத்துச் சம்பாதித்த முதல் பணத்தில் தனது குடும்பத்திற்காகப் பல தியாகங்களைச் செய்த அம்மாவுக்குப் பரிசு வழங்க வேண்டும் என்று உறுதியோடு இருந்ததாகவும் குறிப்பிட்டுள்ளார். மேலும், “பெற்றோரை பெருமைப்படுத்துவதும், அவர்களின் ஆனந்தக் கண்ணீரைப் பார்ப்பதும் இந்த உலகில் எதற்கும் ஈடாகாது” என்றும் உழைக்கும் இளைஞர்களுக்குத் தன் பதிவின் மூலம் ஊக்கமளித்துள்ளார். இந்த வீடியோவைக் கண்ட சமூக ஊடகப் பயனர்கள் பலரும், தங்களின் பெற்றோருடனான உணர்வுப்பூர்வமான நினைவுகளையும், இதே போன்ற தங்களின் கனவுகளையும் கருத்துப் பெட்டியில் நெகிழ்ச்சியோடு பகிர்ந்து வருகின்றனர்.