“அந்த பேச்சுக்கே இங்க இடமில்லை..!” ஸ்டாலின் எங்களை அப்படி வளர்க்கவில்லை… அதிரடி ஆதாரங்களுடன் எ.வ.வேலுவின் பகிரங்க பிரஸ்மீட்..!!

நெடுஞ்சாலைத்துறை டெண்டர் முறைகேடு வழக்கில் லஞ்ச ஒழிப்புத்துறை தன் மீது எடுத்த நடவடிக்கைகள் மற்றும் லுக்அவுட் நோட்டீஸ் போன்ற விவகாரங்களுக்கு எதிராக, சிங்கப்பூரில் மருத்துவச் சிகிச்சை பெற்று வந்த திமுக முன்னாள் அமைச்சர் எ.வ.வேலு அதிரடியான விளக்கங்களை அளித்துள்ளார். அரசியல் பழிவாங்கும் நடவடிக்கைகளுக்கு அஞ்சி தாம் பதுங்கவோ அல்லது ஓடவோ இல்லை என்று திட்டவட்டமாகக் கூறியுள்ள அவர், “அரசியல் களத்தில் ஒழிவது, பதுங்குவது என்ற பேச்சுக்கே திமுகவில் இடமில்லை; எங்களின் தலைவர் மு.க.ஸ்டாலினோ அல்லது கலைஞர் அவர்களோ எங்களை அப்படி பயந்து வளர்க்கவில்லை” என்று ஆக்ரோஷமாகப் பிரஸ்மீட்டில் தெரிவித்துள்ளார்.

சட்டத்திற்குப் பயந்து தாம் சிங்கப்பூருக்குத் தப்பியோடிவிட்டதாக ஊடகங்களில் பரவி வரும் வதந்திகளுக்குத் தனது மருத்துவ ஆவணங்கள் மற்றும் பயண டிக்கெட்டுகளைச் சான்றாக முன்வைத்து எ.வ.வேலு மறுப்புத் தெரிவித்துள்ளார். கடந்த 2016-ஆம் ஆண்டு முதலே சிங்கப்பூர் மவுண்ட் எலிசபெத் மருத்துவமனையில் தாம் தொடர்ந்து இதயச் சிகிச்சை பெற்று வருவதாகவும், வழக்கமான முழு உடல் பரிசோதனைக்காகவே கடந்த ஜூன் 15-ஆம் தேதியே விசா விண்ணப்பித்து, ஜூன் 17-ல் விசா மற்றும் விமான டிக்கெட்டுகளைப் பெற்றதாகவும் விவரித்துள்ளார். கடந்த ஜூன் 25 அன்று லஞ்ச ஒழிப்புத்துறையினர் சோதனை நடத்த வந்தபோதே தன்னிடம் இருந்த சிங்கப்பூர் விமான டிக்கெட்டை அதிகாரிகளிடம் காட்டிவிட்டு, விசாரணைக்கு முழு ஒத்துழைப்பு அளித்த பின்னரே ஜூன் 26 அன்று சிங்கப்பூர் சென்றதாகக் குறிப்பிட்டுள்ளார்.

இதற்கிடையில், லஞ்ச ஒழிப்புத்துறை விடுத்த எச்சரிக்கை மற்றும் லுக்அவுட் நோட்டீஸிற்கு சென்னை உயர் நீதிமன்றம் அண்மையில் இடைக்காலத் தடை விதித்துள்ளது. 70 வயதைக் கடந்த ஒரு இதய நோயாளிக்குக் கால அவகாசம் வழங்காமல் அவசரப்படுத்துவதை எதிர்த்த எ.வ.வேலுவின் மேல்முறையீட்டை நீதிமன்றம் ஏற்றுக்கொண்டது. நீதிமன்ற உத்தரவுப்படி, ஜூலை 12 அன்று அவர் சிங்கப்பூரிலிருந்து திரும்பியதும், ஜூலை 15-ஆம் தேதி விசாரணை அதிகாரி முன்னிலையில் ஆஜராக வேண்டும் என்ற நிபந்தனையுடன் இந்தத் தடை விதிக்கப்பட்டுள்ளது. சட்டத்தை எதிர்கொள்ள தாம் முழுத் தயார் நிலையில் இருப்பதாக வேலு தெரிவித்துள்ள இந்த விபரம் தமிழக அரசியலில் பெரும் பரப்பை ஏற்படுத்தியுள்ளது.