தமிழக அரசியலில் வெடித்த புதிய புயல்…”ஒரு கோடி இளைஞர்களை நடுத்தெருவில் விட்ட முதல்வர் விஜய்…!”ஆர்.பி. உதயகுமார் கடும் தாக்கு..!!!

கடந்த 2025 செப்டம்பர் மாதம் கரூரில் நடைபெற்ற தமிழக வெற்றிக் கழகத்தின் தேர்தல் பிரசாரக் கூட்ட நெரிசலில் சிக்கி 41 பேர் உயிரிழந்தனர். இந்தச் சம்பவத்தில் பாதிக்கப்பட்ட குடும்பங்களைச் சேர்ந்த 31 பேருக்கு, மனிதாபிமான அடிப்படையில் தற்காலிக அரசுப் பணி நியமன ஆணைகளை முதலமைச்சர் சி. ஜோசப் விஜய் அண்மையில் நேரில் வழங்கினார். கடந்த கால நிர்வாகச் சிக்கல்களைத் தாண்டி பாதிக்கப்பட்டவர்களின் வாழ்வாதாரத்தைக் காக்கவே இந்நடவடிக்கை எடுக்கப்பட்டதாக முதல்வர் விஜய் விளக்கமளித்துள்ளார்.

முதலமைச்சரின் இந்த நடவடிக்கைக்கு எதிர்க்கட்சிகள் தரப்பில் இருந்து கடுமையான விமர்சனங்களும் எதிர்ப்புகளும் கிளம்பியுள்ளன. குறிப்பாக, அதிமுக முன்னாள் அமைச்சரும், தற்போதைய சட்டமன்ற எதிர்க்கட்சித் துணைத் தலைவருமான ஆர்.பி. உதயகுமார் இந்த முடிவைக் காரசாரமாக விமர்சித்துள்ளார். ஒரு தனியார் அரசியல் கட்சியின் கூட்டத்தில் ஏற்பட்ட விபத்திற்கு, மக்கள் வரிப்பணத்தில் இயங்கும் அரசுத் துறைகளில் வேலை வழங்குவது அதிகாரத் துஷ்பிரயோகம் என்றும், தவெகவின் சொந்தக் கட்சித் தவறுகளுக்குத் தங்களின் சொந்த நிதியிலிருந்து மட்டுமே இழப்பீடு வழங்கியிருக்க வேண்டும் என்றும் அவர் சாடியுள்ளார்.

மேலும், அரசுத் தேர்வுகளுக்காக இரவு பகலாகப் படித்துக் காத்துக் கிடக்கும் ஒரு கோடி ஏழை எளிய தமிழக இளைஞர்களின் எதிர்காலத்தை முதலமைச்சர் விஜய் தெருவில் நிறுத்திவிட்டதாக ஆர்.பி. உதயகுமார் குற்றம் சாட்டியுள்ளார். நீதிமன்ற உத்தரவின் பயத்தினாலேயே தற்போது தற்காலிகப் பணியிடங்களாக இவை வழங்கப்பட்டுள்ளதாகக் குறிப்பிட்ட அவர், தகுதியுடைய லட்சக்கணக்கான இளைஞர்களின் வேலைவாய்ப்பு உரிமையைப் பறிக்கும் இந்த அரசாணையைத் தவெக அரசு உடனடியாகத் திரும்பப் பெற வேண்டும் என்றும் வலியுறுத்தியுள்ளார். இந்த விவகாரம் தற்போது தமிழக அரசியல் வட்டாரத்தில் பெரிய விவாதப் புயலைக் கிளப்பியுள்ளது.