LATEST NEWS
“எழுத்துப்பூர்வ உத்தரவாதம் வேண்டும்..!” பாஜகவின் தூதுக்கு திமுக போட்ட அதிரடி நிபந்தனை.. தொகுதி மறுவரையறை விவகாரத்தில் திடீர் திருப்பம்..!!
தொகுதி மறுவரையறை விவகாரத்தில் திமுகவின் ஆதரவைப் பெறுவதற்காக, பாஜக தலைவர்கள் திமுக நிர்வாகிகளுடன் ரகசியப் பேச்சுவார்த்தை நடத்தியதாகவும், அதற்குத் திமுக தரப்பில் முக்கிய நிபந்தனைகள் விதிக்கப்பட்டதாகவும் தகவல்கள் வெளியாகியுள்ளன. முன்னதாக, கடந்த ஏப்ரல் 16-ஆம் தேதி மக்களவையில் மத்திய அரசு அறிமுகப்படுத்திய தொகுதி மறுவரையறை மசோதாவில், 2011-ஆம் ஆண்டு மக்கள் தொகைக் கணக்கெடுப்பின்படி தொகுதிகளை மாற்றியமைப்பது, மக்களவை உறுப்பினர்களின் அதிகபட்ச எண்ணிக்கையை 850 ஆக உயர்த்துவது மற்றும் நாடாளுமன்றம், சட்டப்பேரவைகளில் பெண்களுக்கு 33 சதவீத இடஒதுக்கீட்டை அமல்படுத்துவது போன்ற முக்கிய அம்சங்கள் இடம்பெற்றிருந்தன. ஆனால், மக்கள் தொகை அடிப்படையில் தொகுதிகளைப் பிரித்தால் தென் மாநிலங்களின் நாடாளுமன்றப் பிரதிநிதித்துவம் குறையும் என்ற அச்சத்தை வெளிப்படுத்தி எதிர்க்கட்சிகள் இந்த மசோதாவுக்குக் கடும் எதிர்ப்புத் தெரிவித்தன.
இந்தச் சூழலில், மசோதாவை நிறைவேற்றும் நோக்கில் திமுகவின் ஆதரவைத் திரட்ட பாஜக தலைவர்கள் முயற்சி மேற்கொண்டுள்ளதாகக் கூறப்படுகிறது. இதற்காக நடைபெற்ற ஆலோசனையின்போது, தொகுதி மறுவரையறை நடவடிக்கையால் தமிழகத்தின் பிரதிநிதித்துவம் எந்த வகையிலும் பாதிக்கப்படாது என்பதற்கும், மாநில உரிமைகள் மற்றும் நலன்கள் முழுமையாகப் பாதுகாக்கப்படும் என்பதற்கும் மத்திய அரசு எழுத்துப்பூர்வமான உத்தரவாதம் அளிக்க வேண்டும் எனத் திமுக தரப்பில் திட்டவட்டமாக நிபந்தனை விதிக்கப்பட்டுள்ளது. மேலும், இவ்விவகாரத்தில் அவசரப்படாமல் அனைத்து மாநிலங்களின் கருத்துகளையும் கேட்டறிந்து, விரிவான ஆலோசனைகளை நடத்திய பின்னரே அடுத்தகட்ட நடவடிக்கை எடுக்க வேண்டும் என்ற கோரிக்கையும் திமுக சார்பில் முன்வைக்கப்பட்டுள்ளதாகத் தெரிகிறது.
