இந்த வயசுல இது தேவையா..?” பாட்டி சொன்ன அந்த ஒரு வார்த்தை.. தலையணையை வைத்து கதையை முடித்த பேத்தி.. விசாரணையில் அம்பலமான திடுக்கிடும் சம்பவம்..!!

கர்நாடகா மாநிலம் மாண்டியா மாவட்டம் கே.ஆர்.பேட்டை தாலுக்காவுக்கு உட்பட்ட பூக்கனகெரே பகுதியில் அரங்கேறியுள்ள ஒரு கொடூரச் சம்பவம் அப்பகுதியில் பெரும் அதிர்ச்சியையும் சோகத்தையும் ஏற்படுத்தியுள்ளது. இப்பகுதியைச் சேர்ந்த 18 வயதுக்குட்பட்ட இளம்பெண் ஒருவர், ஆகாஷ் என்பவரை தீவிரமாகக் காதலித்து வந்துள்ளார். இவர்களது காதலுக்கு அப்பெண்ணின் 52 வயது பாட்டி மகாதேவம்மா கடும் எதிர்ப்புத் தெரிவித்துள்ளார். இளம் வயதில் காதல் வேண்டாம் என்றும், படிப்பிலும் எதிர்காலத்திலும் முழுமையாகக் கவனம் செலுத்தும்படியும் அவர் தனது பேத்தியை தொடர்ந்து அறிவுறுத்தி வந்துள்ளார்.

தனது காதலுக்குத் தடையாக இருந்த பாட்டியை எப்படியாவது வழியிலிருந்து அகற்ற வேண்டும் என அந்தப் பேத்தி, காதலன் ஆகாஷ் உடன் சேர்ந்து கோரமான சதித் திட்டம் தீட்டியுள்ளாள். அதன்படி, வீட்டில் ஆள் இல்லாத தனிப்பட்ட நேரத்தை உன்னிப்பாகக் கவனித்து இருவரும் சேர்ந்து திட்டமிட்டுச் செயல்பட்டுள்ளனர். மகாதேவம்மாவின் முகத்தில் தலையணையை வைத்து அழுத்தி மூச்சுத்திணறச் செய்து அவரை கொடூரமாகக் கொலை செய்துள்ளனர். இந்தச் கொலையைச் செய்தபிறகும், பாட்டியின் மரணம் குறித்துத் தனக்கு ஒன்றுமே தெரியாதது போல அந்தப் பேத்தி இயல்பாக நடித்து நாடகமாடியது அனைவரையும் மேலும் அதிரச் செய்துள்ளது.

இதற்கிடையே, மகாதேவம்மாவின் திடீர் மரணம் குறித்து உறவினர்கள் மற்றும் அப்பகுதி மக்களிடையே சந்தேகம் வலுத்தது. இதுகுறித்துத் தகவலறிந்த காவல்துறையினர் உடனடியாக விழிப்படைந்து தீவிர விசாரணையைத் தொடங்கினர். விசாரணையின் போக்கில் பேத்தியின் மீது சந்தேகம் திரும்பியதை அடுத்து, அவரை காவல்துறையினர் தங்கள் காவலில் எடுத்து விசாரித்து வருகின்றனர். மேலும், இக்கொலைச் சம்பவத்திற்குப் பிறகு தப்பியோடிய காதலன் ஆகாஷை கைது செய்ய காவல்துறையினர் தீவிர வலைவீசித் தேடி வருகின்றனர்.