“இனி விசிறியில் உயிரை மாய்க்க முடியாது..!” மாணவர்கள் விடுதிகளில் திடீர் மாற்றம்.. சூரத் பல்கலைக்கழகத்தின் மாஸ்டர் பிளான்..!!

குஜராத் மாநிலம் சூரத்திலுள்ள வீர் நர்மத் தெற்கு குஜராத் பல்கலைக்கழகம், மாணவர்களின் பாதுகாப்பை உறுதி செய்யும் நோக்கில் தங்களின் 9 விடுதிகளில் 388 சிறப்பு ‘தற்கொலை தடுப்பு விசிறிகளை’ நிறுவி அதிரடி நடவடிக்கை எடுத்துள்ளது. இந்த விசிறிகள் ஒரு குறிப்பிட்ட ஸ்பிரிங் பொறிமுறையுடன் வடிவமைக்கப்பட்டுள்ளன. இதன் சிறப்பம்சம் என்னவென்றால், இந்த விசிறிகளின் மீது 10 கிலோவிற்கும் அதிகமான எடை கொடுக்கப்பட்டால், அது உடனடியாக கீழ்நோக்கி வளைந்துவிடும். கூரை விசிறிகளைப் பயன்படுத்தி மாணவர்கள் தற்கொலைக்கு முயல்வதைத் தடுப்பதே இந்த புதிய தொழில்நுட்பத்தின் முக்கிய நோக்கமாகும்.

இதர பல்கலைக்கழகங்களில் நடைபெற்ற தற்கொலைச் சம்பவங்களை முன்னுதாரணமாகக் கொண்டு, முன்னெச்சரிக்கை நடவடிக்கையாக இந்த முக்கிய முடிவை நிர்வாகம் எடுத்துள்ளது. இந்தத் திட்டத்தின் கீழ், பல்கலைக்கழக வளாகத்திலுள்ள 5 மாணவிகள் விடுதிகளில் 170 விசிறிகளும், 4 மாணவர்கள் விடுதிகளில் 218 விசிறிகளும் என மொத்தம் 388 சிறப்பு விசிறிகள் வெற்றிகரமாகப் பொருத்தப்பட்டுள்ளன. மாணவர்களின் மன அழுத்தத்தைக் கையாளும் அதே வேளையில், இத்தகைய தொழில்நுட்பக் கண்டுபிடிப்புகள் தற்கொலை முயற்சிகளை ஆரம்பக் கட்டத்திலேயே முறியடிக்க உதவும் என பல்கலைக்கழக நிர்வாகம் நம்பிக்கை தெரிவித்துள்ளது.