CRIME
அடபாவிகளா.. இறந்த தம்பதியின் கணக்கிலும் கைவரிசை.. கணக்கே தொடங்காமல்பல லட்சத்தை சுருட்டிய போஸ்ட் ஆபீஸ் ஊழியர்கள்.. பகீர் பின்னணி..!!
உத்தரப் பிரதேச மாநிலம் கான்பூர் மாவட்டத்தில் உள்ள கடம்பூர் துணை அஞ்சல் அலுவலகத்தில், கிராம மக்களின் சேமிப்புத் திட்டங்களிலிருந்து கோடிக்கணக்கான ரூபாய் கையாடல் செய்யப்பட்ட பெரும் மோசடி வெளிச்சத்திற்கு வந்துள்ளது. பல ஆண்டுகளாகத் தாங்கள் கஷ்டப்பட்டுச் சம்பாதித்த பணத்தை பல்வேறு அஞ்சலகத் திட்டங்களில் முதலீடு செய்த கிராம மக்கள், முதிர்வுக் காலம் முடிந்து பணத்தை எடுக்கச் சென்றபோது பெரும் அதிர்ச்சியடைந்தனர். தங்கள் வைப்புத்தொகை குறித்த எந்தப் பதிவும் அஞ்சலக ஆவணங்களில் இல்லை என்பதையும், பலருக்குக் கணக்கு தொடங்கப்படும் நடைமுறை கூட முறையாக முடிக்கப்படவில்லை என்பதையும் அவர்கள் கண்டறிந்தனர். இந்த விவகாரத்தில் இதுவரை 25-க்கும் மேற்பட்டோர் அதிகாரப்பூர்வமாகப் புகார் அளித்துள்ள நிலையில், மேலும் பல வாடிக்கையாளர்கள் பாதிக்கப்பட்டிருக்கலாம் என அஞ்சப்படுகிறது.
இந்த மோசடித் திட்டம் குறித்த அதிர்ச்சியூட்டும் விவரங்கள், ஆகாங்ஷா சௌராசியா என்பவர் அளித்த புகாரின் மூலம் வெளிவந்தன. தனது மறைந்த பெற்றோர்களான ஜிதேந்திர குமார் சௌராசியா மற்றும் அர்ச்சனா சௌராசியா ஆகியோரின் கூட்டுச் சேமிப்புக் கணக்கிலிருந்து, 2025 ஜனவரி மற்றும் மே மாதங்களில் இரண்டு தவணைகளாக மொத்தம் ரூ.7.13 லட்சம் சட்டவிரோதமாக எடுக்கப்பட்டதை அவர் சுட்டிக்காட்டினார். இதையடுத்து நடத்தப்பட்ட துறைசார் விசாரணையில், அஞ்சல் உதவியாளர் சிவம் சச்சனின் பயனர் ஐடி (User ID) மூலம் கணக்குகளிலிருந்து பணம் எடுக்கப்பட்டதும், அப்போதைய பொறுப்பு துணை அஞ்சல் அதிகாரி ராகேஷ் குமார் மிஸ்ராவின் மேற்பார்வை ஐடி மூலம் அப்பரிவர்த்தனைகள் அங்கீகரிக்கப்பட்டதும் உறுதியானது.
இரு ஊழியர்களும் தங்கள் பதவியையும் துறைசார் அதிகாரத்தையும் தவறாகப் பயன்படுத்திப் பணத்தைக் கையாடல் செய்தது உள்விசாரணையில் நிரூபணமானதைத் தொடர்ந்து, அவர்கள் உடனடியாகப் பணியிடை நீக்கம் செய்யப்பட்டனர். அலுவலகக் கண்காணிப்பாளர் ரவி குமார் அளித்த புகாரின் பேரில் கடம்பூர் காவல் நிலையத்தில் இருவர் மீதும் வழக்குப் பதிவு செய்யப்பட்டது. விசாரணையில் தங்களது குற்றத்தை ஒப்புக்கொண்ட சிவம் சச்சன் மற்றும் ராகேஷ் குமார் மிஸ்ரா ஆகியோரை காவல்துறையினர் கைது செய்து நீதிமன்றத்தில் ஆஜர்படுத்திச் சிறையில் அடைத்தனர். தற்போது இந்த மோசடியில் கையாடல் செய்யப்பட்ட மொத்தத் தொகை மற்றும் பாதிக்கப்பட்ட பிற வாடிக்கையாளர்களின் விவரங்களைக் கண்டறிய காவல்துறையும் அஞ்சல் துறையும் இணைந்து தீவிர விசாரணை நடத்தி வருகின்றன.
