“எங்கள தொட்டுப் பார்த்தா நடப்பதே வேறு..!” போலீசுக்கே சவால் விட்ட ரவுடிகள்… கோவையில் அரங்கேறிய சினிமா பாணி கைது.. பரபரப்பு பின்னணி..!!

விமானத்தில் பறந்து வந்து தமிழகம் முழுவதும் தொடர் கொலை மற்றும் கொள்ளைச் சம்பவங்களில் ஈடுபட்டு வந்த 9 பேர் கொண்ட பயங்கரவாதக் கும்பலை, கோவை மாநகர காவல் துறையினர் மிகச் சாதுரியமாகச் சுற்றி வளைத்து அதிரடியாகக் கைது செய்துள்ளனர். கடந்த 2025 டிசம்பரில் கோவையில் கல்லூரி மாணவர்களைக் கத்திமுனையில் மிரட்டிப் பறிப்பில் ஈடுபட்ட இந்தக் கும்பல், தங்களைப் பிடிக்க முயன்ற ரோந்து போலீசார் மீது மிளகாய்ப் பொடியைத் தூவிவிட்டுத் தப்பியோடியது. அதன் தொடர்ச்சியாகத் தேனி மாவட்டத்தில் ஒரு காவல் சார்பு ஆய்வாளரின் வீட்டிலேயே புகுந்து 100 பவுன் நகைகளைக் கொள்ளையடித்த இந்தக் கும்பல், போலீசாரின் தேடுதல் வளையத்தில் இருந்து தப்பிக்கத் தலைநகர் டெல்லிக்கு விமானம் மூலம் பறந்து சென்று பல மாதங்கள் ரகசியமாகத் தலைமறைவாக இருந்தது.

டெல்லியில் பதுங்கியிருந்தபடியே தங்கள் நாச வேலைகளைத் திட்டமிட்ட இந்தக் கும்பல், கடந்த மாதம் மீண்டும் விமானம் மூலம் தமிழகத்திற்கு வந்து இறங்கியுள்ளது. வந்த வேகத்தில் சிவகங்கை மாவட்டம் கீழடியில் ஒருவரைக் கொடூரமான முறையில் படுகொலை செய்துவிட்டு, மீண்டும் தங்களது முக்கியக் குற்றக் களமாக விளங்கிய கோவைக்கே தப்பி வந்து ஒளிந்து கொண்டது. இவர்களின் தொடர் அத்துமீறல்களுக்கு முற்றுப்புள்ளி வைக்க, கோவை மாநகர காவல் ஆணையர் ரம்யாபாரதி மற்றும் துணை ஆணையர் கார்த்திகேயன் ஆகியோரின் நேரடி உத்தரவின் பேரில், குனியமுத்தூர் காவல் துறையினர் அடங்கிய தனிப்படை அமைக்கப்பட்டு, நவீனத் தொழில்நுட்பங்கள் மற்றும் சிசிடிவி கேமராக்கள் மூலம் தீவிரக் கண்காணிப்புப் பணிகள் முடுக்கிவிடப்பட்டன.

இறுதியில், கோவை உக்கடம் பகுதியில் பதுங்கியிருந்த கும்பலின் தலைவனான சிவகங்கையைச் சேர்ந்த ஆகாஷ் (23) உட்பட தஞ்சாவூர், திண்டுக்கல், கோவை, மதுரை ஆகிய மாவட்டங்களைச் சேர்ந்த 9 குற்றவாளிகளைப் போலீசார் அதிரடியாக வேட்டையாடிப் பிடித்தனர். கைதானவர்களில் ஆகாஷ் மீது 25 வழக்குகளும், அருண் மீது 31 வழக்குகளும், முத்துப்பாண்டி மீது 18 வழக்குகளும் நிலுவையில் இருப்பதுடன், இவர்களிடமிருந்து கஞ்சா, மெத்தம்பேட்டமைன் போன்ற வீரியமிக்க போதைப்பொருட்களும் பறிமுதல் செய்யப்பட்டுள்ளன. “எங்களைத் தொட்டுப் பார்த்தால் நடப்பதே வேறு” என்று இந்தக் கும்பல் காவல் துறைக்கே சவால் விடுத்து வெளியிட்ட மிரட்டல் வீடியோ இணையத்தில் வைரலாகி வரும் நிலையில், கைதான 9 பேரும் நீதிமன்றத்தில் ஆஜர்படுத்தப்பட்டு கோவை மத்திய சிறையில் அடைக்கப்பட்டுள்ளனர்.