‘ஐ லவ் யூ’… சக மாணவிக்கு 4-ஆம் வகுப்பு சிறுவன் கொடுத்த லவ் லெட்டர்… கிழித்துப் போட்ட ஆசிரியைக்கு நேர்ந்த சிக்கல்..!!

குஜராத் மாநிலம் அகமதாபாத்தில் உள்ள பிரைட் இங்கிலீஷ் பள்ளியில் நான்காம் வகுப்பு பயிலும் மாணவன் ஒருவன், தனது சக மாணவிக்கு ‘நான் உன்னை காதலிக்கிறேன்’ என எழுதப்பட்ட துண்டுச் சீட்டைக் கொடுத்ததால் ஆசிரியர் மற்றும் முதல்வரால் தாக்கப்பட்டதாகக் கூறப்படுகிறது. செப்டம்பர் 19 அன்று நடந்த இச்சம்பவத்தில், சிறுவர்கள் தன்னைத் தொடர்ந்து கேலி செய்வதாகக் கூறி அந்தச் சிறுமி அழுதுகொண்டே ஆசிரியையிடம் புகார் அளித்தாள். ஆசிரியை சீமா கோஸ்வாமி ஆரம்பத்தில் அந்தச் சீட்டைக் கிழித்துச் சிறுவனைக் கண்டித்தாலும், சிறுமி தொடர்ந்து மன உளைச்சலில் இருந்ததால், இவ்விஷயம் தலைமையாசிரியரிடம் கொண்டு செல்லப்பட்டு சிறுவனின் தாயார் பள்ளிக்கு அழைக்கப்பட்டார்.

பள்ளி நிர்வாகத்தினரிடம் பேசிவிட்டுச் சென்ற சிறுவனின் தாய், சிறிது நேரத்திலேயே தனது குடும்பத்தினருடன் திரும்பி வந்து, தன் மகன் கடுமையாகத் தாக்கப்பட்டதாகக் குற்றம் சாட்டினார். உடனடியாக ஆம்புலன்ஸை வரவழைத்து, மருத்துவப் பரிசோதனைக்காகச் சிறுவனை எல்.ஜி. மருத்துவமனைக்கு அழைத்துச் சென்றனர். அதனைத் தொடர்ந்து, நிர்வாகமும் ஊழியர்களும் தன் மகனைக் கடுமையாகத் தாக்கியதாகக் கூறி, சிறுவனின் குடும்பத்தினர் ராமோல் காவல் நிலையத்தில் புகார் அளித்தனர். இந்தப் புகாரின் அடிப்படையில் ஆசிரியை கோஸ்வாமி மற்றும் பள்ளியின் இயக்குநர் இந்திரஜித் மௌரியா மீது காவல்துறை வழக்குப் பதிவு செய்தது.

தாக்குதல் குற்றச்சாட்டுகளை முற்றிலும் மறுத்த இயக்குநர் மௌரியா, சிறுவன் நலமுடன் ஓடிச் செல்வதை சிசிடிவி காட்சிகள் காட்டுவதாகவும், வெளிப்படைத்தன்மைக்காக விசாரணை முடியும் வரை ஆசிரியை இடைநீக்கம் செய்யப்பட்டுள்ளதாகவும் தெரிவித்தார். மேலும், காவல்துறை நடவடிக்கையைத் தவிர்க்க சிறுவனின் குடும்பத்தினர் தன்னிடம் 25 லட்சம் ரூபாய் கேட்டுப் பின்னர் அதை 5 லட்சமாகக் குறைத்துப் பணம் பறிக்க முயன்றதாகவும், கல்விக் கட்டணத்தை ரத்து செய்யும் பள்ளியின் சலுகையை அவர்கள் நிராகரித்துவிட்டதாகவும் அவர் எதிர் குற்றச்சாட்டை முன்வைத்தார். இதற்கிடையே, முதற்கட்ட மருத்துவப் பரிசோதனையில் சிறுவனுக்குப் பெரிய காயங்கள் ஏதுமில்லை எனத் தெரிவித்த காவல்துறை, சிசிடிவி காட்சிகள் மற்றும் சாட்சிகளின் வாக்குமூலங்களைக் கொண்டு தீவிர விசாரணை நடத்தி வருகிறது.