“கிளாஸ் ரூமுக்கு வந்த அந்த ஒரு போன் கால்..!” வெளியே சென்ற கல்லூரி மாணவனுக்கு நேர்ந்த கொடூரம்.. கும்பலின் வெறிச்செயல்.. நெஞ்சை உலுக்கும் சம்பவம்..!!

பெங்களூரு நாகரபாவி பகுதியில் உள்ள கல்லூரிக்கு அருகே, புதன்கிழமை மதியம் 19 வயது பிகாம் முதலாமாண்டு மாணவர் யோகேஷ் என்பவர் ஒரு கும்பலால் நடுரோட்டில் குத்திக் கொலை செய்யப்பட்ட கொடூரச் சம்பவம் பெரும் அதிர்ச்சியை ஏற்படுத்தியுள்ளது. நாகதேவனஹள்ளியைச் சேர்ந்த யோகேஷ், மகேஷ் பியூ கல்லூரியில் படித்து வந்துள்ளார். மதியம் சுமார் 2:30 மணியளவில் வகுப்பறையில் இருந்த யோகேஷிற்கு ஒரு போன் கால் வந்துள்ளது, அதில் ஒரு நபர் அவரை வெளியே வருமாறு அழைத்துள்ளார். தனது வகுப்புத் தோழன் ஒருவனுடன் யோகேஷ் வெளியே சென்றபோது, கல்லூரியின் பின்புறம் உள்ள உடற்பயிற்சிக் கூடம் அருகே அவரது கல்லூரி மாணவர் ஒருவர் உட்பட 5-6 பேர் கொண்ட இளைஞர் பட்டாளம் காத்திருந்தது. அங்கு அவர்களுக்கிடையே ஏற்பட்ட கடுமையான வாக்குவாதத்தை அடுத்து, அந்தக் கும்பல் யோகேஷை கொடூரமாகத் தாக்கியதுடன், அவர்களில் ஒருவன் கூர்மையான கத்தியால் அவரது நெஞ்சில் பலமாகக் குத்தியுள்ளான்.

நெஞ்சில் ஆழமான கத்திக் குத்து விழுந்ததில் ரத்த வெள்ளத்தில் சரிந்த யோகேஷை, அவருடன் வந்த வகுப்புத் தோழன் உடனடியாக பைக்கில் ஏற்றி அருகில் உள்ள மருத்துவமனைக்குக் கொண்டு சென்றுள்ளார்; ஆனால் அவர் ஏற்கனவே இறந்துவிட்டதாக மருத்துவர்கள் தெரிவித்துள்ளனர். இக்கொடூரச் சம்பவத்தைத் தொடர்ந்து தாக்குதல் நடத்திய கும்பல் அங்கிருந்து தப்பியோடியது. இதுகுறித்து மேற்கு மண்டல டிசிபி யதீஷ் கூறுகையில், கொலையாளிகளைப் பிடிக்கத் தனிப்படை அமைக்கப்பட்டுள்ளதாகத் தெரிவித்துள்ளார். முதற்கட்ட விசாரணையில், லக்கேரே பகுதியைச் சேர்ந்த இந்தக் கும்பலுக்கும் யோகேஷிற்கும் இடையே ஒரு பெண் தோழி தொடர்பாக ஏற்பட்ட மோதலே இந்தக் கொலைக்குக் காரணமாக இருக்கலாம் எனப் போலீஸார் சந்தேகிக்கின்றனர்.