ரூ.1.5 லட்சம் செலவழித்தும்… தாய்ப்பாலைக் குப்பையில் வீசிவிட்டு பழைய பவுடர் பால்… பச்சிளம் குழந்தைக்கு நடந்த துரோகம்..! கண்ணீரில் தாய்..!!

குஜராத் மாநிலம் சூரத் கிட்ஸ் மருத்துவமனையின் தீவிர சிகிச்சைப் பிரிவில் அனுமதிக்கப்பட்டுள்ள பச்சிளம் குழந்தைக்கு, இரண்டு நாள்கள் பழமையான பவுடர் பால் புகட்டப்பட்ட சம்பவம் பெரும் அதிர்ச்சியை ஏற்படுத்தியுள்ளது. சிகிச்சைக்கு ஒன்றரை லட்சம் ரூபாய்க்கு மேல் செலவு செய்தும், முறையான கவனிப்பு கிடைக்காமல் தாய் ஒருவர் கண்ணீருடன் வேதனை தெரிவித்துள்ளார்.

பிரத்யேகக் கருவி மூலம் சேகரித்துத் தரும் புதிய தாய்ப்பாலைப் பயன்படுத்தாமல் குப்பையில் வீசிவிட்டு, எதிர்ப்புச் சக்தியற்ற பழைய பாலைப் பச்சிளம் பிஞ்சுக்கு ஊட்டியுள்ளது அங்கு நிலவும் அப்பட்டமான நிர்வாகச் சீர்கேட்டையும் மனிதநேயமற்ற அலட்சியத்தையும் அம்பலப்படுத்துகிறது.

பச்சிளம் குழந்தைகளுக்கு இயற்கை அருளிய அமுதமான தாய்ப்பாலே மிகச்சிறந்த ஊட்டச்சத்தும் நோய் எதிர்ப்பு கேடயமுமாகும். அதனை உதாசீனப்படுத்தி, பிஞ்சு உயிரின் நலனில் விளையாடிய சூரத் மருத்துவமனை நிர்வாகம் மற்றும் அலட்சியமாகச் செயல்பட்ட ஊழியர்கள் மீது சுகாதாரத் துறை உடனடியாகத் தீவிர விசாரணை நடத்தி, சமரசமற்ற கடுமையான சட்ட நடவடிக்கை எடுக்க வேண்டும். இனி எந்தவொரு தாயும் மருத்துவமனைக் கூடாரங்களில் தன் மார்புப் பாலை வீணடித்துக் கண்ணீர் சிந்தாதவாறு கடுமையான தண்டனை உறுதி செய்யப்பட வேண்டும்.