கமல் தயாரிப்பில் ரஜினி…சீனியர் இயக்குநர்கள் சொதப்பியதால்…சூப்பர் ஸ்டார் எடுத்த அதிரடி முடிவு…சிம்பு படத்தை தள்ளிவைத்துவிட்டு ரஜினியை இயக்கும் அஸ்வத் மாரிமுத்து… சென்னையில் ரகசியமாகத் தொடங்கிய ஷூட்டிங்…!

சூப்பர் ஸ்டார் ரஜினிகாந்த் கதாநாயகனாக நடிக்க, உலகநாயகன் கமல்ஹாசன் தனது ‘ராஜ் கமல் ஃபிலிம்ஸ் இன்டர்நேஷனல்’ நிறுவனம் மூலம் தயாரிக்கும் ‘தலைவர் 173’ திரைப்படத்தின் இயக்குநர் மாற்றம் குறித்த சுவாரசியமான தகவல்கள் கோலிவுட் வட்டாரத்தில் பெரும் பரபரப்பை ஏற்படுத்தியுள்ளன. ரஜினியும் கமலும் இணைந்து ஒரு படத்தில் நடிக்கப்போவதாக முதலில் தகவல்கள் பரவினாலும், அந்தப் படம் தாமதமாகும் என்பதால் முதற்கட்டமாக ரஜினியை வைத்து கமல் ஒரு படத்தை தயாரிக்க முடிவு செய்தார்.

இளம் இயக்குநர்கள் சிலர் ரஜினிக்குச் சொதப்பலான படங்களைக் கொடுத்ததால், இம்முறை சீனியர் இயக்குநரான சுந்தர்.சி வசம் இந்தப் பொறுப்பு ஒப்படைக்கப்பட்டது. ரசிகர்களிடையே நல்ல எதிர்பார்ப்பு நிலவிய சூழலில், சுந்தர்.சி திடீரென இப்படத்திலிருந்து விலகுவதாக அறிவித்து அதிர்ச்சியளித்தார். அவர் ‘ஃபர்ஸ்ட் காப்பி’ அடிப்படையில் படத்தை இயக்க விரும்பியதாகவும், அதற்கு கமல் சம்மதிக்காததே காரணம் என்றும் கூறப்பட்ட நிலையில், சுந்தர்.சி அறிக்கை ஒன்றின் மூலம் அத்தவறான தகவல்களைத் திட்டவட்டமாக மறுத்து, எந்தப் பிரச்சினையும் இன்றி சுமுகமாகவே வெளியேறியதாக விளக்கமளித்தார்.

சுந்தர்.சியின் வெளியேற்றத்தைத் தொடர்ந்து, ‘டான்’ பட இயக்குநர் சிபி சக்கரவர்த்தி ‘தலைவர் 173’ படத்தை இயக்கும் பொறுப்பை ஏற்றார். பொது மேடை ஒன்றில் பேசிய அவர், “எல்லோருக்கும் பிடிக்கும்படியான ஒரு தரமான படத்தைத் தலைவருக்குக் கொடுப்பேன், இது சத்தியம்” என்று ரசிகர்களுக்கு உறுதியளித்திருந்தார். ஆனால், துரதிர்ஷ்டவசமாக அவரும் தற்போது இப்படத்திலிருந்து விலகிவிட்டதாகத் தகவல்கள் வெளியாகியுள்ளன. சிபி சக்கரவர்த்தி சொன்ன கதையில் ரஜினிக்குச் சில மாற்றங்கள் தேவைப்பட்டதாகவும், அதனால் அவர் சொன்ன கதையைத் தள்ளி வைத்துவிட்டு வேறொரு கதையில் நடிக்க ரஜினி முடிவெடுத்ததாகவும் சினிமா வட்டாரங்கள் தெரிவிக்கின்றன.

சுந்தர்.சி மற்றும் சிபி சக்கரவர்த்தியைத் தொடர்ந்து, தற்போது ‘ஓ மை கடவுளே’ பட இயக்குநர் அஸ்வத் மாரிமுத்து புதிய இயக்குநராகக் கமிட்டாகியுள்ளார். இப்படத்திற்காக அவர் நடிகர் சிலம்பரசனை வைத்து இயக்கவிருந்த படத்தைக்கூடத் தள்ளி வைத்திருப்பதாகக் கூறப்படுகிறது. இப்படத்தின் படப்பிடிப்பு தற்போது சென்னையில் விறுவிறுப்பாகத் தொடங்கியுள்ளது; முதற்கட்டமாக ரஜினிகாந்த் பங்கேற்காத பாடல் காட்சிகளை, சாண்டி மாஸ்டரின் நடன அமைப்பில் இயக்குநர் அஸ்வத் மாரிமுத்து படமாக்கி வருகிறார். இன்னும் நான்கு நாட்களுக்குள் சூப்பர் ஸ்டார் ரஜினிகாந்தும் இந்த ஷூட்டிங்கில் கலந்துகொள்வார் என்று மூத்த பத்திரிகையாளர் சித்ரா லட்சுமணன் தெரிவித்துள்ளதால், ரஜினி – கமல் கூட்டணியின் இந்த மெகா பிராஜெக்ட் தற்போதே காட்டுத்தீயாய் இணையத்தில் வைரலாகி வருகிறது.