எக்மோர் ஆஸ்பத்திரிக்கு முதல்வர் விஜய் திடீர் விசிட்.. அமைச்சர்களைக் காப்பாற்றவா?.. கசிந்த அதிர்ச்சி பின்னணி..!!!

சென்னை எக்மோர் அரசு தாய்-சேய் நல மருத்துவமனைக்கு முதலமைச்சர் சி. ஜோசப் விஜய் எவ்வித முன்அறிவிப்பும் இன்றி நேற்று அதிரடியாக மேற்கொண்ட திடீர் ஆய்வு, தமிழக அரசியல் வட்டாரத்திலும் சமூக வலைதளங்களிலும் பெரும் விவாதத்தை ஏற்படுத்தியுள்ளது. சமீபத்திய சில அமைச்சர்களின் சர்ச்சைகளையும் துறையின் குளறுபடிகளையும் மூடி மறைக்கவே இந்த விசிட் என எதிர்க்கட்சிகள் விமர்சித்து வரும் நிலையில், கடந்த சில தினங்களாக இந்த மருத்துவமனையின் சுகாதாரம் மற்றும் லஞ்சப் புகார்கள் குறித்து சமூக வலைதளங்களில் வெளியான ஒரு வைரல் வீடியோவே முதல்வரின் இந்த அதிரடி நடவடிக்கைக்கு நிஜ பின்னணி என்பது வெளிச்சத்திற்கு வந்துள்ளது. பிரசவ வார்டுகள் மற்றும் பச்சிளம் குழந்தைகளுக்கான தீவிர சிகிச்சைப் பிரிவுகளுக்கு நேரடியாகச் சென்று ஆய்வு நடத்திய முதலமைச்சர், அங்கு சிகிச்சை பெற்று வரும் தாய்மார்களிடம் குறைகளைக் கேட்டறிந்ததோடு, சில பச்சிளம் குழந்தைகளைத் தனது கைகளில் ஏந்தி அரவணைத்து, நோயாளிகளின் நலனில் கூடுதல் அக்கறை செலுத்துமாறு மருத்துவர்களுக்கும் ஊழியர்களுக்கும் அறிவுறுத்தினார்.

இந்த ஆய்வின் போது, பிரசவத்திற்குப் பின் குழந்தைகளை உறவினர்களிடம் காட்ட அங்கிருக்கும் சில ஊழியர்கள் லஞ்சம் கேட்பதாகப் பொதுமக்கள் முதல்வரிடம் நேரடியாகப் புகார் அளித்தனர். இதனால் கடும் அதிருப்தியடைந்த முதலமைச்சர் விஜய், லஞ்சப் புகாரில் சிக்கிய குறிப்பிட்ட ஒப்பந்தப் பணியாளர்களை அங்கேயே உடனடியாகப் பணிநீக்கம் செய்ய உத்தரவிட்டதுடன், வார்டு பொறுப்பாளர்களான உயர் அதிகாரிகள் மீது துறை ரீதியான நடவடிக்கை எடுக்கவும் கறாராக ஆணையிட்டார். மேலும், முதல்வருடன் வந்திருந்த சுகாதாரத்துறை அமைச்சர் கே.ஜி. அருண்ராஜ் மற்றும் சுகாதாரத்துறைச் செயலாளர் தாரேஸ் அகமது ஆகியோரிடம் கூடுதல் கழிப்பறைகள், புதிய வார்டுகள் மற்றும் கேண்டீன் வசதிகள் உள்ளிட்ட மக்களின் கோரிக்கைகளை நிறைவேற்ற உடனடியாக ஒரு ஒருங்கிணைந்த வளர்ச்சித் திட்டத்தைத் தயாரிக்குமாறு உத்தரவிட்டார். அமைச்சர்களைக் காப்பாற்ற முதல்வர் வரவில்லை; மாறாக ஏழை எளிய மக்களுக்கான அரசு மருத்துவமனைகளில் நேர்மையான, வெளிப்படையான நிர்வாகத்தை உறுதி செய்யவே இந்த அதிரடி விசிட் எனச் சுகாதாரத்துறை அமைச்சர் பின்னர் விளக்கமளித்துள்ளார்.