“41 பேர் உயிரிழந்த போது எங்கே போனீர்கள்?” – விஜய்யை நோக்கிப் பாய்ந்த நயினாரின் அடுக்கடுக்கான கேள்விகள்… அனல் பறக்கும் பேச்சு…!!

தமிழக முதல்வரும், தமிழக வெற்றிக் கழகத்தின் தலைவருமான விஜய் பங்கேற்ற நன்றி அறிவிப்பு மற்றும் மக்கள் சந்திப்பு கூட்டம் அண்மையில் கரூர் மாவட்டம் காதப்பாறையில் நடைபெற்றது. இந்நிகழ்வில் பள்ளிக்கல்வித்துறை அமைச்சர் ராஜ்மோகன் வரவேற்புரையாற்றினார். இந்நிலையில், மேடையில் அமைச்சர் ஆற்றிய உரையை மையமாக வைத்து, தமிழக பாஜக தலைவர் நயினார் நாகேந்திரன் தனது ‘எக்ஸ்’ சமூக வலைத்தளப் பக்கத்தில் கடுமையான விமர்சனங்களை முன்வைத்துள்ளார்.

தனது கண்டனப் பதிவில், அமைச்சர் ராஜ்மோகன் பிற மதத்தினரின் வாழ்த்து வார்த்தைகளை மட்டும் மேடையில் கூறிவிட்டு, இந்து மத நம்பிக்கைகளைத் திட்டமிட்டே புறக்கணித்துள்ளதாக நயினார் நாகேந்திரன் குற்றம் சாட்டியுள்ளார். அனைவருக்குமான அரசு என கூறிக்கொள்ளும் ஆளும் தரப்பு, வாக்கு வங்கிக்காக மட்டுமே இப்படிச் செயல்படுவதாகச் சாடியுள்ள அவர், ஆன்மீகப் பின்னணியைக் கொண்ட தமிழகத்தில் இதுபோன்ற பாரபட்சமான அணுகுமுறைகள் உண்மையான மதநல்லிணக்கத்திற்கு வழிவகுக்காது எனவும் அதிருப்தி தெரிவித்துள்ளார்.

மேலும், கடந்த ஆண்டு கரூரில் விஜய்யைக் காண வந்த கூட்டத்தில் ஏற்பட்ட நெரிசலில் சிக்கி 41 பேர் உயிரிழந்த துயரச் சம்பவத்தையும் அவர் தனது பதிவில் சுட்டிக்காட்டியுள்ளார். இத்தனை உயிர்கள் பலியான நிலையில், ஓராண்டு காலம் கழித்துத் தாமதமாகவே முதல்வரும் அமைச்சரும் கரூருக்கு வந்துள்ளதாக அவர் விமர்சித்துள்ளார். பாதிக்கப்பட்ட மக்களுக்கு ஆறுதல் கூற வந்த இடத்தில் கூட, இதுபோன்ற வெறுப்பு அரசியலை முன்னெடுப்பதை மக்கள் ஏற்க மாட்டார்கள் என்றும், இந்தச் செயல்களுக்கான விளைவுகளை ஆளும் அரசு விரைவில் சந்திக்கும் என்றும் அவர் எச்சரித்துள்ளார்.