மாற்று அரசியல் இதுதானா?தண்ணீரில் கார்ப்பரேட் வணிகமா?… முதல்வர் விஜய்யை வறுத்தெடுத்த சீமான்..!!

சேலம் மாநகராட்சியின் குடிநீர் விநியோகம் மற்றும் பராமரிப்புப் பணிகளைப் பிரான்ஸ் நாட்டைச் சேர்ந்த ‘சூயஸ்’ என்ற பன்னாட்டு நிறுவனத்திற்கு 25 ஆண்டுகளுக்கு குத்தகைக்கு விடும் முடிவை முதலமைச்சர் சி. ஜோசப் விஜய் தலைமையிலான தமிழக அரசு எடுத்துள்ளது. நகராட்சி நிர்வாகத் துறையைத் தன்வசம் வைத்துள்ள முதல்வரின் இந்தத் திடீர் அறிவிப்புக்கு, நாம் தமிழர் கட்சியின் தலைமை ஒருங்கிணைப்பாளர் சீமான் தனது கடுமையான எதிர்ப்பைப் பதிவு செய்துள்ளார். மக்களின் அடிப்படைத் தேவையான குடிநீரைத் தனியார்மயமாக்கும் இந்த நடவடிக்கையானது தமிழக அரசியல் களத்தில் பெரும் பரபரப்பை ஏற்படுத்தியுள்ளது.

தண்ணீரை வெறும் வியாபாரப் பொருளாகப் பார்க்கும் சூயஸ் நிறுவனம், ஏற்கனவே அர்ஜென்டினா, பொலிவியா போன்ற நாடுகளில் இயற்கை வளங்களைச் சுரண்டி, அந்நாட்டு மக்களால் விரட்டியடிக்கப்பட்ட மோசமான பின்னணியைக் கொண்டது என சீமான் தனது அறிக்கையில் சுட்டிக்காட்டியுள்ளார். நீர் என்பது மனிதர்களுக்கு மட்டுமின்றி அனைத்து உயிர்களுக்குமான அடிப்படை உரிமை என்பதை வலியுறுத்தியுள்ள அவர், மாபெரும் அதிகாரங்களைக் கொண்ட அரசு இயந்திரத்தால் வழங்க முடியாத ஒரு சேவையைத் தனியார் நிறுவனம் வழங்கிவிடுமா என்று முதலமைச்சரைக் கூட்டிக் காட்டியுள்ளார்.

இந்தத் திட்டத்திற்கு எதிராக ஏற்கனவே சேலம் மாநகராட்சிக் கூட்டங்களில் திமுக, அதிமுக உள்ளிட்ட எதிர்க்கட்சிகள் கடும் அமளியில் ஈடுபட்ட நிலையில், சீமானின் தற்போதைய விமர்சனம் இந்த விவகாரத்தை மாநில அளவிலான பேசுபொருளாக மாற்றியுள்ளது. மக்களுக்கான மாற்று அரசியலை முன்னெடுப்பதாகக் கூறி ஆட்சியமைத்த தவெக அரசு, தற்போது கார்ப்பரேட் நிறுவனங்களுக்குச் சாதகமாகச் செயல்படுவதாகச் சமூக வலைத்தளங்களிலும் விமர்சனங்கள் குவிந்து வருகின்றன. குடிநீரைத் தனியாருக்குத் தாரைவார்க்கும் இந்தக் குற்றச்சாட்டுகளுக்குத் தமிழக அரசு என்ன பதிலளிக்கப் போகிறது என்பதே தற்போதைய மிகப்பெரிய எதிர்பார்ப்பாக உள்ளது.