“அந்த நடிப்பு எனக்கு செருப்படி மாதிரி இருந்தது!”… மேடையிலேயே ஓப்பனாக உடைத்த இயக்குநர் இரா. சரவணன்…!

‘ஜமா’ திரைப்படத்தின் மூலம் இயக்குநராகவும் நடிகராகவும் அறிமுகமாகி மிகப்பெரிய வெற்றியைப் பதிவு செய்தவர் பாரி இளவழகன். இசைஞானி இளையராஜா இசையில் உருவான அந்தப் படம் விமர்சன ரீதியாக நல்ல வரவேற்பைப் பெற்ற நிலையில், அவரது அடுத்த படைப்பான ‘அன்பே டயானா’ திரைப்படம் ஜூலை 17-ஆம் தேதி திரைக்கு வரவுள்ளது. பாரி இளவழகனுடன் சேத்தன், ரோஜா உள்ளிட்டோர் நடித்துள்ள இப்படத்தின் ட்ரெய்லர் சமீபத்தில் வெளியாகி, முந்தைய படத்தின் வெற்றியால் ரசிகர்கள் மத்தியில் படத்தின் மீதான எதிர்பார்ப்பை எகிறச் செய்துள்ளது.

இந்த ட்ரெய்லர் வெளியீட்டு விழாவில், ‘கத்துக்குட்டி’, ‘உடன்பிறப்பே’, ‘நந்தன்’ ஆகிய படங்களின் இயக்குநர் இரா. சரவணன் கலந்துகொண்டு பல சுவாரஸ்யமான தகவல்களைப் பகிர்ந்துகொண்டார். பாரி இளவழகன் கதையைச் சொல்லும்போதே அனைத்து கதாபாத்திரங்களாகவும் மாறி நடித்துக் காட்டிய விதம் தன்னை மிகவும் கவர்ந்ததாக அவர் தெரிவித்தார். தன்னிடம் போதிய பணம் இல்லை என்றாலும், அந்தச் சிறப்பான கதையின் மீதிருந்த ஈர்ப்பாலும், யுவராஜ் கணேசனின் ஊக்கத்தாலும் இந்தத் திரைப்படத்தின் தயாரிப்பாளர்களில் ஒருவராகத் தானும் இணைந்ததை அவர் நெகிழ்ச்சியுடன் குறிப்பிட்டார்.

தனது முதல் படமான ‘ஜமா’விற்கு போதிய அளவில் விளம்பரம் கிடைக்கவில்லை என்ற வருத்தம் பாரி இளவழகனுக்கு இருந்ததால், ‘அன்பே டயானா’ படத்திற்காக நள்ளிரவு என்றும் பாராமல் அவர் தீவிரமாகப் புரொமோஷன் பணிகளில் ஈடுபட்டு வருவதாக சரவணன் பாராட்டினார். மேலும், இப்படத்தில் நடித்துள்ள ரம்யாவின் புகைப்படத்தைப் பார்த்தபோது தமக்கு பெரிய ஈர்ப்பு ஏற்படவில்லை என்றாலும், ஒரு காட்சியில் அவருடைய அபாரமான நடிப்பைப் பார்த்து தான் எழுந்து நின்று கைதட்டியதாகப் புகழ்ந்து பேசினார். இந்தப் படம் வெற்றியடைந்து பாரி இளவழகன் சினிமாவில் மிகப்பெரிய உயரத்தை அடைவார் என்றும் அவர் தனது முழுமையான நம்பிக்கையை வெளிப்படுத்தினார்.