ஃபேஸ்புக் குரூப் இல்லீங்க… இது எங்க ஃபேமிலி..! 6 தலைமுறைப் பாசத்தில் திளைக்கும் 83 பேரின் கூட்டுக்குடும்பக் காவியம்..!!

ஆந்திர மாநிலத்தைச் சேர்ந்த ‘நாகப்பா’ குடும்பத்தினர், இன்றைய நவீன காலத்திலும் தங்களது பாரம்பரிய கூட்டுக் குடும்ப முறையை மிகவும் போற்றத்தக்க வகையில் உயிர்ப்புடன் வைத்திருக் கின்றனர். இந்தக் குடும்பத்தில் மொத்தம் 6 தலைமுறைகளைச் சேர்ந்த 83 உறுப்பினர்கள் உள்ளனர். இவர்கள் அனைவரும் ஒரே குடும்பமாக, மிகுந்த நல்லிணக்கத்துடனும் மகிழ்ச்சியுடனும் வாழ்ந்து வருகின்றனர். தலைமுறை தலைமுறையாக விவசாயம் மற்றும் இதர வேலைகளைச் செய்து, தங்களின் வாழ்வாதாரத்தை இவர்கள் ஈட்டி வருகின்றனர்.

இத்தனை பெரிய குடும்ப உறுப்பினர்கள் அனைவரும் ஒரே கூரையின் கீழ் வசிப்பது சாத்தியமில்லை என்பதால், இவர்கள் அருகருகே உள்ள 4 வீடுகளில் வசித்து வருகின்றனர். வீடுகள் தனித்தனியாக இருந்தாலும், அவர்கள் அனைவரும் ஒரே இல்லமாகவே செயல்படுகிறார்கள். குடும்பத்தின் ஆண்கள் அனைவரும் ஒன்றாக வேலைக்குச் செல்கிறார்கள்; பெண்கள் அனைவரும் ஒன்றாகச் சேர்ந்து சமைக்கிறார்கள். ஒட்டுமொத்த குடும்பத்திற்கும் தேவையான உணவு, வருமானம் மற்றும் அனைத்துப் பொறுப்புகளும் சமமாகப் பகிர்ந்து கொள்ளப்படுகின்றன.

இன்றைய காலகட்டத்தில் கூட்டுக் குடும்ப முறை மறைந்து வரும் நிலையில், நாகப்பா குடும்பம் சமுதாயத்திற்கு ஒரு சிறந்த எடுத்துக்காட்டாகத் திகழ்கிறது. இந்த வீட்டில் உள்ள அனைவரும் தங்களின் மகிழ்ச்சி மற்றும் துக்கங்களை ஒன்றாகப் பகிர்ந்து கொள்வதால், யாரும் தனிமையாகவோ அல்லது மன அழுத்தத்துடனோ உணர்வதில்லை என நெகிழ்ச்சியுடன் குறிப்பிடுகிறார்கள். குறிப்பாக, இத்தகைய சூழலில் குழந்தைகள் மிகவும் பாதுகாப்பாகவும் எளிதாகவும் வளர்க்கப்படுகிறார்கள். இக்குடும்பத்தின் புகைப்படங்கள் தற்போது சமூக வலைதளங்களில் பலரது கவனத்தை ஈர்த்து வைரலாகி வருகின்றன.