தண்ணீரால் கழுவினாலும் போகாது..! அமெரிக்காவை அலற வைக்கும் ‘சைக்ளோஸ்போரா’ ஒட்டுண்ணி.. உஷார் பின்னணி..!!!

அமெரிக்காவில் ‘சைக்ளோஸ்போரியாசிஸ்’ என்ற கடுமையான குடல் சார்ந்த ஒட்டுண்ணித் தொற்று வேகமாகப் பரவி வருகிறது. நாட்டின் 31 மாநிலங்களில் சுமார் 3,000-க்கும் மேற்பட்ட மக்கள் இந்த நோயால் பாதிக்கப்பட்டுள்ளதோடு, 86-க்கும் மேற்பட்டோர் கடுமையான பாதிப்புகளுடன் மருத்துவமனையில் அனுமதிக்கப்பட்டுள்ளனர். குறிப்பாக, மிச்சிகன் மாநிலம் மிகக் கடுமையான பாதிப்பைச் சந்தித்து 1,562 வழக்குகள் பதிவாகியுள்ளன. இது அங்கு வழக்கமாக ஒரு வருடத்தில் பதிவாகும் எண்ணிக்கையை விட மிக அதிகமாகும்.

சைக்ளோஸ்போரியாசிஸ் என்பது ‘சைக்ளோஸ்போரா’ என்ற நுண்ணிய ஒட்டுண்ணியால் பரவக்கூடிய ஒரு உணவுவழி நோயாகும். இந்தத் தொற்று ஏற்பட்ட நபர்களுக்குக் கட்டுப்படுத்த முடியாத கடுமையான வயிற்றுப்போக்கு, உடல் சோர்வு, வயிற்றுப் பிடிப்பு, வாயுத் தொல்லை, குமட்டல் மற்றும் பசியின்மை போன்ற அறிகுறிகள் தோன்றும். பொதுவாக அசுத்தமான உணவை உட்கொண்ட ஒரு வாரத்திற்குப் பிறகுதான் இந்த அறிகுறிகள் வெளியே தெரியவரும். இதற்கு முறையான ஆன்டிபயாடிக் சிகிச்சை அளிக்கப்படாவிட்டால், இந்த பாதிப்பு பல வாரங்களுக்கு நீடிக்க வாய்ப்புள்ளது.

இந்த ஒட்டுண்ணி ஒரு மனிதரிடமிருந்து மற்றொரு மனிதருக்கு நேரடியாகப் பரவாது. மாறாக, அசுத்தமான கொத்தமல்லி, கீரை வகைகள் மற்றும் ரஸ்ப்பெர்ரி பழங்கள் போன்ற உணவுகள் மூலமாகவே பரவுகிறது. சாதாரணத் தண்ணீரைக் கொண்டு இதனைக் கழுவி எளிதில் அகற்ற முடியாது என்பதால், உணவைச் சமைப்பது மட்டுமே இந்த ஒட்டுண்ணியை அழிக்க ஒரே வழியாகும். அமெரிக்காவின் சிடிசி மற்றும் எஃப்டிஏ அமைப்புகள் இத்தொற்றின் மூலத்தைக் கண்டறிய தீவிர விசாரணை நடத்தி வரும் வேளையில், பொதுமக்கள் காய்கறிகளை ஓடும் குழாய் நீரில் நன்கு தேய்த்துக் கழுவவும், சமையலறைப் பொருட்களைச் சுத்தமாக வைத்திருக்கவும் சுகாதாரத் துறை அதிகாரிகள் அறிவுறுத்தியுள்ளனர்.