பணத்திமிரில் ரீல்ஸ் காட்டிய யூடியூபர்.. ஸ்கெட்ச் போட்டு 118 பவுன் நகையை அள்ளிய வாலிபர் சிக்கியது எப்படி..? திக் திக் பின்னணி..!!

பிரபல பெண் யூடியூபர் மதுமிதா வீட்டின் பூட்டை உடைத்து 118 பவுன் தங்க நகைகளைக் கொள்ளையடித்த வழக்கில், தூத்துக்குடி மாவட்டம் ஸ்ரீவைகுண்டத்தைச் சேர்ந்த இசக்கிபாண்டி (30) என்ற வாலிபரை போலீசார் கைது செய்துள்ளனர். நாகர்கோவில் அருகே அனந்த நாடார்குடியிருப்பில் வசிக்கும் தொழிலதிபர் வினோத்குமாரின் மனைவியான மதுமிதா, சமூக வலைதளங்களில் ஆடம்பர ஆடைகள் மற்றும் நகைகளை அணிந்து ‘ரீல்ஸ்’ வீடியோக்களை வெளியிடுவதை வழக்கமாகக் கொண்டிருந்தார். இந்த வீடியோக்களைப் பார்த்து ஈர்க்கப்பட்ட இசக்கிபாண்டி, திட்டமிட்டு இந்தக் கொள்ளைச் சம்பவத்தை அரங்கேற்றியதாக போலீசாரிடம் வாக்குமூலம் அளித்துள்ளார்.

கடந்த செப்டம்பர் 24-ம் தேதி மாலை, மதுமிதாவும் அவரது கணவரும் துணிகள் வாங்குவதற்காக காரில் திருநெல்வேலிக்குச் சென்றுள்ளனர். தம்பதியினர் வீட்டில் இல்லாத இந்தச் சந்தர்ப்பத்தை சரியாக நோட்டமிட்ட கொள்ளையர்கள், வீட்டின் உள்ளே புகுந்து பீரோவில் வைக்கப்பட்டிருந்த 118 பவுன் நகைகளைத் திருடிக்கொண்டு தப்பி ஓடிவிட்டனர். இதுகுறித்து ராஜாக்கமங்கலம் காவல் நிலையத்தில் புகார் அளிக்கப்பட்டதை அடுத்து, குற்றவாளிகளைப் பிடிக்க கன்னியாகுமரி துணை போலீஸ் சூப்பிரண்டு பிரகாஷ் தலைமையில் 3 தனிப்படைகள் அமைக்கப்பட்டன.

தனிப்படை போலீசார் அந்தப் பகுதியில் இருந்த சுமார் 600-க்கும் மேற்பட்ட கண்காணிப்பு கேமரா (CCTV) காட்சிகளைத் தீவிரமாக ஆய்வு செய்தனர். அதில், ஹெல்மெட் மற்றும் முகக்கவசம் அணிந்த இருவர் ஆன்லைன் டெலிவரி பையுடன் மோட்டார் சைக்கிளில் சந்தேகத்திற்கிடமாகச் செல்லும் காட்சிகள் சிக்கின. அந்தப் பதிவுகளைத் தொடர்ந்து பின்தொடர்ந்தபோது, கொள்ளையர்களில் ஒருவன் பார்வதிபுரம் நோக்கியும், மற்றொருவன் திருநெல்வேலி நோக்கியும் தப்பிச் சென்றது தெரியவந்தது. இந்தத் தடயங்களின் அடிப்படையிலேயே முதற்கட்டமாக இசக்கிபாண்டி கைது செய்யப்பட்டார்.

தற்போது கைது செய்யப்பட்டுள்ள இசக்கிபாண்டியனிடம் போலீசார் தீவிர விசாரணை நடத்தி வருகின்றனர். இந்த பெரும் கொள்ளைச் சம்பவத்தில் அவனுக்கு வேறு யாரெல்லாம் உதவி செய்தார்கள், மற்றும் கேமரா காட்சிகளில் அவனுடன் பைக்கில் சென்ற மற்றொரு நபர் யார் என்பது குறித்த தேடுதல் வேட்டையையும் போலீசார் தீவிரப்படுத்தியுள்ளனர். சமூக வலைதளங்களில் பகிரப்படும் வீடியோக்கள் எவ்வாறு குற்றவாளிகளுக்குக் களம் அமைத்துக் கொடுக்கிறது என்பதற்கு இந்தச் சம்பவம் ஒரு எச்சரிக்கையாக அமைந்துள்ளது.