LATEST NEWS
“வேணும்னே தான் எங்க மேல ஏத்துனாரு..” சாலையில் கிடந்தவரைத் தூக்க முயன்றவர்கள் மீது ஏறி இறங்கிய கல்லூரிப் பேருந்து.. காயமடைந்தவர் சொன்ன பகீர் உண்மை..!!
பஞ்சாபின் லூதியானா மாவட்டத்தில் உள்ள மச்சிவாரா-குஹாரா சாலையில் ஞாயிற்றுக்கிழமையன்று, போதையில் சாலையில் கிடந்த இளைஞருக்கு உதவ நின்றிருந்த மக்கள் குழுவினர் மீது அதிவேகமாக வந்த மஞ்சள் நிறக் கல்லூரிப் பேருந்து மோதியது. சமூக வலைதளங்களில் வைரலாகி வரும் இது தொடர்பான காணொளியில், சில ஆண்கள் தங்கள் இருசக்கர வாகனங்களுடன் நின்று சாலையில் படுத்துக்கிடக்கும் நபரைப் பாதுகாப்பான இடத்திற்கு நகர்த்த முயல்வதும், அப்போது பின்னால் இருந்து வந்த பேருந்து அவர்கள் மீது ஏறிச் செல்வதும் பதிவாகியுள்ளது; அந்த இடத்தில் ஒரு சிறு குழந்தையும் இருந்துள்ளது.
விபத்தில் காயமடைந்த கிரண்தீப் சிங் கூறுகையில், தனது காரைப் பழுதுபார்ப்பதற்காக மச்சிவாராவுக்குச் சென்று கொண்டிருந்தபோது, போதையில் ஸ்கூட்டரில் வந்து சாலையில் விழுந்து கிடந்த இளைஞனைக் கண்டு தாமும் ‘கல்சா ஜி’ உள்ளிட்ட மற்றவர்களும் உதவிக்காக நின்றதாகத் தெரிவித்தார். அவர்கள் அந்த இளைஞனை அருகிலுள்ள பெட்ரோல் நிலையத்தை நோக்கி அப்புறப்படுத்திக் கொண்டிருந்தபோது இவ்விபத்து நிகழ்ந்துள்ளது. விபத்தின் தாக்கம் மிகவும் கடுமையாக இருந்ததால் தனது தலைப்பாகை கழன்று தூரத்தில் விழுந்ததாகவும், தனக்குக் கழுத்து, முதுகு மற்றும் கால்களில் பலத்த காயங்கள் ஏற்பட்டதாகவும் காயமடைந்த மற்றொருவரான பிரதீப் சிங் விவரித்தார்.
மேலும், பேருந்து ஓட்டுநர் போதையில் இருந்ததாகவும், பேருந்து மோதிய விதத்தைப் பார்க்கும்போது இது ஒரு திட்டமிட்ட தாக்குதலாக இருக்கலாம் எனச் சந்தேகிப்பதாகவும் கிரண்தீப் குற்றம் சாட்டினார். சம்பவத்திற்குப் பிறகு அங்கிருந்தவர்கள் காவல்துறைக்குத் தகவல் தெரிவித்ததைத் தொடர்ந்து ஓட்டுநர் கைது செய்யப்பட்டார். இதற்கிடையே, ஞாயிற்றுக்கிழமை என்பதால் மச்சிவாரா மருத்துவமனையில் மருத்துவர் யாரும் இல்லை என்றும், ‘முதலுதவி’ என்ற பெயரில் தங்களுக்கு ஊசிகள் மட்டும் போடப்பட்டு பின்னர் வேறு மருத்துவமனைக்கு அனுப்பி வைக்கப்பட்டதாகவும் காயமடைந்தவர்கள் குற்றம் சாட்டியுள்ளனர்.
