LATEST NEWS
“PF வச்சிருக்கிறவங்களுக்கு அடிச்சது ஜாக்பாட்..” இனி முழுப் பணத்தையும் எடுக்க 12 மாசம் காத்திருக்க வேண்டாம்.. EPFO கொண்டு வந்த 3 அதிரடி மாற்றங்கள்..!!
கடந்த ஆண்டு அக்டோபரில் கொண்டுவரப்பட்ட மாற்றத்தின்படி, வேலையை இழந்தவர்கள் முழு PF தொகையையும் பெற 12 மாதங்கள் காத்திருக்க வேண்டியிருந்தது; இதனால் குடும்பச் செலவுகள், வீட்டு வாடகை, குழந்தைகளின் கல்வி மற்றும் மருத்துவச் செலவுகள் போன்ற அவசரத் தேவைகளுக்கு, குறிப்பாக வேலை மாற்ற இடைப்பட்ட காலத்தில் சேமிப்பைப் பயன்படுத்த வேண்டியவர்களுக்குப் பெரும் சிரமம் ஏற்பட்டது. தற்போது அந்தக் காத்திருப்பு காலத்தை மீண்டும் 2 மாதங்களாகக் குறைக்க ஒப்புதல் அளிக்கப்பட்டுள்ளது. இதன் மூலம் தொடர்ந்து 2 மாதங்கள் வேலையின்றி இருப்பவர்கள் இறுதித் தீர்வாக முழு PF தொகையையும் பெற விண்ணப்பிக்க முடியும்; இருப்பினும் அதிகாரப்பூர்வ அறிவிப்பு மற்றும் நடைமுறைத் திருத்தங்கள் வெளியான பிறகே இது அமலுக்கு வரும். மேலும், PF கணக்கில் குறைந்தபட்சம் வைத்திருக்க வேண்டிய தொகை 25 சதவீதத்திலிருந்து 10 சதவீதமாகக் குறைக்கப்பட்டுள்ளதால், ஊழியர்கள் தேவைக்கேற்பவும் அவசரத் தேவைகளுக்கும் தங்கள் சேமிப்பில் அதிகத் தொகையைப் பயன்படுத்த முடியும்.
ஓய்வுபெறும் ஊழியர்களுக்கு உதவும் வகையில், வழக்கமான மொத்தத் தொகைக்குப் பதிலாக குறிப்பிட்ட கால இடைவெளியில் தவணைகளாகப் பெறும் புதிய முறையை EPFO அறிமுகப்படுத்தத் திட்டமிட்டுள்ளது. இதில் முழுத் தொகையையும் தவணைகளாகப் பெறுவது, ஒரு பகுதியை மொத்தமாகப் பெற்று மீதத்தை மாதாந்திர அல்லது குறிப்பிட்ட இடைவெளித் தவணைகளாகப் பெறுவது, அல்லது அசலை அப்படியே வைத்து வட்டியை மட்டும் பெறுவது போன்ற வாய்ப்புகள் பரிசீலிக்கப்பட்டுள்ளன. கணக்கில் இருக்கும் பணத்துக்கு நடைமுறையில் உள்ள EPF வட்டி கிடைக்கும் இத்திட்டத்தில், எந்த நேரத்திலும் வெளியேறி மீதத் தொகையை முழுமையாகப் பெறவும், பயனாளர் உயிரிழந்தால் மீதத் தொகையை மனைவி அல்லது நியமனதாரர் தொடர்ந்து பெறவும் வழிவகை செய்யப்பட்டுள்ளது. 55 வயதுக்கு மேற்பட்டு PF கணக்கில் ரூ.5 லட்சத்துக்கும் அதிகமாகச் சேமிப்பு வைத்திருக்கும் சுமார் 6.32 லட்சம் பேருக்கு இது பயனளிக்கலாம் எனக் கணிக்கப்பட்டுள்ள நிலையில், திட்டத் திருத்தங்களுக்குப் பிறகு சுமார் 2 மாதங்களுக்குள் அமலுக்கு வர எதிர்பார்க்கப்படுகிறது.
இறுதி ஓய்வூதியத் தொகையைப் பெறுவதற்கான குறைந்தபட்சக் காத்திருப்பு காலம் 36 மாதங்களாகவே தொடரும். அதேசமயம், சம்பளப் பட்டியல் மட்டுமின்றி குறிப்பிட்ட டிஜிட்டல் வழிகளிலும் விருப்பத்தின் அடிப்படையில் PF கணக்கில் பணம் செலுத்தும் வசதியும், கிக் தொழிலாளர்கள், தளங்களில் பணிபுரிபவர்கள், வீட்டு வேலை செய்பவர்கள் உள்ளிட்ட அமைப்புசாரா துறையினருக்கு உதவும் வகையில் பரிசுகள், டிப்ஸ் மற்றும் பிற சிறிய தொகைகளை UAN இணைக்கப்பட்ட PF கணக்கில் செலுத்தும் வாய்ப்பும் ஆலோசிக்கப்பட்டுள்ளன. வேலை இழந்தோருக்கான காத்திருப்புக் காலம் மற்றும் குறைந்தபட்ச இருப்புத் தொகைக் குறைப்பு ஆகியவற்றுடன், ஓய்வுக்குப் பிந்தைய தவணைத் திட்டமும் நடைமுறைக்கு வந்தால் ஊழியர்களின் ஓய்வுக்கால நிதி நிர்வாகத்தில் குறிப்பிடத்தக்க மாற்றத்தை ஏற்படுத்தும்.
