நடுவானில் நடுக்கம்..! புறப்பட்ட 5 நிமிடத்தில் ஏர் இந்தியா விமானத்திற்கு நேர்ந்த பயங்கரம்… 109 பயணிகளின் திக் திக் நிமிடங்கள்.. ஹைதராபாத்தில் பரபரப்பு..!!

மகாராஷ்டிர மாநிலம் மும்பைக்கு 109 பயணிகளுடன் புறப்பட்ட ஏர் இந்தியா விமானத்தில் தொழில்நுட்பக் கோளாறு ஏற்பட்டதை அடுத்து, அது ஹைதராபாத் விமான நிலையத்தில் அவசரமாகத் தரையிறக்கப்பட்டது. தெலுங்கானா மாநிலம் ஹைதராபாத்தில் உள்ள ராஜீவ் காந்தி சர்வதேச விமான நிலையத்திலிருந்து புறப்பட்ட ஐந்து நிமிடங்களிலேயே இந்த அசாதாரண சூழல் ஏற்பட்டது. விமானத்தில் கோளாறு இருப்பதைச் சரியான நேரத்தில் கண்டறிந்த விமானி, உடனடியாக வான்வழிப் போக்குவரத்துக் கட்டுப்பாட்டு அதிகாரிகளுக்குத் தகவல் கொடுத்து விமானத்தைத் திருப்பி, பத்திரமாக மீண்டும் ஹைதராபாத்திலேயே தரையிறக்கினார்.

விமானியின் துரிதமான மற்றும் சாதுரியமான செயலால் விமானத்தில் இருந்த 109 பயணிகளும் எவ்வித ஆபத்துமின்றி பாதுகாப்பாக வெளியேற்றப்பட்டனர், இதன் மூலம் ஒரு மிகப் பெரிய வான்வழி விபத்து தவிர்க்கப்பட்டுள்ளது. தரையிறக்கப்பட்ட அந்த ஏர் இந்தியா விமானம் தற்போது தொழில்நுட்பக் குழுவினரின் வசம் ஒப்படைக்கப்பட்டு, கோளாறுக்கான காரணம் குறித்து தீவிரமாக ஆய்வு செய்யப்பட்டு வருகிறது. பயணிகளுக்கு மாற்று ஏற்பாடுகள் செய்வதற்கான பணிகளில் விமான நிலைய அதிகாரிகள் ஈடுபட்டுள்ளனர்.