நள்ளிரவில் பயங்கரம்..! ஆட்டோவில் வந்து 41 வயது நபரை இரும்பு கம்பியால் கொடூரமாக தாக்கிய கும்பல்.. அலறியடித்து ஓடிவந்த பொதுமக்கள்.. மங்களூருவில் அரங்கேறிய பகீர் சம்பவம்!

கர்நாடக மாநிலம் மங்களூரு அருகே உள்ள பண்ட்வால் ஊரக காவல் துறையினர், 41 வயது நபர் ஒருவரை வாள் மற்றும் இரும்பு கம்பியால் தாக்கி கொடூரமான முறையில் காயப்படுத்திய வழக்கில் தொடர்புடைய 3 குற்றவாளிகளை அதிரடியாகக் கைது செய்துள்ளனர். பண்ட்வால் தென்கபெல்லூரு கிராமத்தின் கம்மாஜே பகுதியைச் சேர்ந்த பிரஷாந்த் பெல்சாத் (41) என்பவர், கடந்த செப்டம்பர் 20 அன்று மாலை கம்மாஜே பகுதியில் இருந்தபோது, அவருக்கு முன்பே அறிமுகமான மூன்று பேர் ஆட்டோவில் வந்துள்ளனர். அவர்கள் திடீரென பிரஷாந்தை வாள் மற்றும் இரும்பு கம்பியால் கொடூரமாகத் தாக்கியதில், அவருக்குப் பலத்த ரத்தக் காயம் ஏற்பட்டது. அருகில் இருந்தவர்கள் ஓடி வருவதைக் கண்டதும் அந்த மூன்று பேரும் சம்பவ இடத்திலிருந்து தப்பியோடிவிட்டனர்.

பலத்த காயமடைந்த பிரஷாந்த் உடனடியாக மங்களூருவில் உள்ள மருத்துவமனைக்குக் கொண்டு செல்லப்பட்டு தீவிர சிகிச்சை பிரிவில் அனுமதிக்கப்பட்டார்.இச்சம்பவம் குறித்து பண்ட்வால் ஊரக போலீசார் பாரதிய நியாய சன்ஹிதாவின் பிரிவுகள் 109, 352, 351 மற்றும் 3(5)-ன் கீழ் வழக்குப் பதிவு செய்து தீவிர விசாரணை நடத்தினர். விசாரணையின் அடிப்படையில், அம்முஞ்சே பகுதியைச் சேர்ந்த பிரஷாந்த் (38), தென்கபெல்லூருவைச் சேர்ந்த ராமதாஸ் (43) மற்றும் படகபெல்லூருவைச் சேர்ந்த சங்கரா (45) ஆகிய மூவரையும் போலீசார் கைது செய்தனர். கைது செய்யப்பட்ட குற்றவாளிகள் கடந்த செப்டம்பர் 25 அன்று நீதிமன்றத்தில் ஆஜர்படுத்தப்பட்டனர். இந்த கொடூரத் தாக்குதலின் பின்னணியில் உள்ள அசல் காரணத்தைக் கண்டறியவும், தீவிர விசாரணை நடத்தவும் நீதிமன்றம் அவர்களை மூன்று நாட்கள் போலீஸ் காவலில் எடுத்து விசாரிக்க அனுமதி வழங்கியுள்ளது.