“அப்பட்டமான அடாவடித்தனம்..!” மேகதாது விவகாரத்தில் கர்நாடகாவை வெளுத்து வாங்கிய மு. வீரபாண்டியன்.. வெடித்த புதிய அரசியல் புயல்..!!

மேகதாது அணை விவகாரத்தில் கர்நாடகாவின் நிலைப்பாட்டிற்கும், அம்மாநிலத் தலைவர்களின் பேச்சுக்கும் இந்தியக் கம்யூனிஸ்ட் கட்சியின் தமிழ்நாடு மாநிலச் செயலாளர் மு. வீரபாண்டியன் கடும் கண்டனம் தெரிவித்துள்ளார். இது தொடர்பாக அவர் வெளியிட்டுள்ள அறிக்கையில், காவிரி நதிநீர்ப் பகிர்வு தொடர்பாக 1892 மற்றும் 1924-ஆம் ஆண்டுகளில் போடப்பட்ட ஒப்பந்தங்கள், பலகட்டப் போராட்டங்கள் மற்றும் 1989-ஆம் ஆண்டு நடைபெற்ற மாபெரும் மனிதச் சங்கிலிப் போராட்டத்திற்குப் பிறகு அமைக்கப்பட்ட நடுவர் மன்றம் மற்றும் உச்ச நீதிமன்றத் தீர்ப்புகளைச் சுட்டிக்காட்டியுள்ளார். 2007-ஆம் ஆண்டு நடுவர் மன்றமும், 2018-ஆம் ஆண்டு உச்ச நீதிமன்றமும் வழங்கிய இறுதித் தீர்ப்புகளில், தமிழ்நாடு, கேரளம் மற்றும் புதுச்சேரி ஆகிய மாநிலங்களின் ஒப்புதல் இன்றி காவிரியின் நீரோட்டத்தில் கர்நாடக அரசு எவ்வித மாற்றமும் செய்யக் கூடாது எனத் தெளிவாக உத்தரவிட்டுள்ளதை அவர் நினைவுகூர்ந்துள்ளார்.

இந்தத் தீர்ப்புகளை மீறி, பெங்களூரு மாநகரின் குடிநீர்த் தேவை என மக்களைத் தவறாக வழிநடத்தி காவிரியின் குறுக்கே மேகதாது அணை கட்ட கர்நாடக அரசு முயல்வது அப்பட்டமான அடாவடித்தனம் என மு. வீரபாண்டியன் சாடியுள்ளார். இத்தகைய செயல் கூட்டாட்சித் தத்துவத்திற்கும், இரு மாநில நல்லுறவிற்கும், நாட்டின் ஒருமைப்பாட்டிற்கும் எதிரானது என அவர் குறிப்பிட்டுள்ளார். மேலும், நாட்டின் பிரதமர் முன்னிலையிலேயே “மேகதாதுவில் அணை கட்டுவதை யாராலும் தடுக்க முடியாது, எந்தக் கண்டனங்களுக்கும் அஞ்சமாட்டோம்” எனப் பேசியிருப்பது வரம்பு மீறிய செயல் எனக் கூறி, அக்கட்சியின் தமிழ்நாடு மாநிலச் செயற்குழு சார்பில் தனது கடுமையான கண்டனத்தைப் பதிவு செய்துள்ளார்.

இறுதியாக, உச்ச நீதிமன்றத்தின் இறுதித் தீர்ப்பையும், கூட்டாட்சி மரபுகளையும் மதித்து நடக்க வேண்டிய மத்திய அரசு, கர்நாடகாவின் இந்த அத்துமீறலுக்கு துணை போகக் கூடாது என இந்தியக் கம்யூனிஸ்ட் கட்சி வலியுறுத்தியுள்ளது. தமிழ்நாட்டின் வாழ்வாதாரமான காவிரி டெல்டா விவசாயிகள் மற்றும் பொதுமக்களின் நலனைக் கருத்தில் கொண்டு, மேகதாதுவில் அணை கட்டுவதற்கு மத்திய அரசு எக்காரணம் கொண்டும் அனுமதி வழங்கக் கூடாது என மு. வீரபாண்டியன் தனது அறிக்கையில் திட்டவட்டமாகக் கேட்டுக்கொண்டுள்ளார்.