“ஒரு வாரத்திற்கு முன்பே நடந்த ஒத்திகை” சிசிடிவியில் சிக்கியும் புகார் அளிக்காதது ஏன்..? மதுரை தனிஷ்க் நகைக்கடை கொள்ளையில் வெளியான பகீர் பின்னணி..!!

மதுரையில் உள்ள பிரபல தனியார் நகைக்கடையான ‘தனிஷ்க்’ (Tanishq) கிளையில், சுமார் ஒரு வாரத்திற்கு முன்பே மர்ம நபர் ஒருவர் உள்ளே புகுந்து கொள்ளையடிக்க முயற்சி செய்த அதிர்ச்சித் தகவல் காவல்துறையினரின் தீவிர விசாரணையில் தற்போது அம்பலமாகியுள்ளது. இந்தத் திருட்டு முயற்சி மற்றும் அந்த நபரின் நடமாட்டம் கடையிலிருந்த கண்காணிப்பு கேமராக்களில் மிகத் தெளிவாகப் பதிவாகியிருந்ததை போலீசார் உறுதி செய்துள்ளனர்.

இருப்பினும், இவ்வளவு பெரிய பாதுகாப்பு அச்சுறுத்தல் ஏற்பட்ட பிறகும், கடை நிர்வாகம் தரப்பில் காவல் நிலையத்தில் உடனடியாக எந்தப் புகாரும் அளிக்கப்படாமல் ஒரு வார காலமாக மறைக்கப்பட்டது பெரும் சந்தேகத்தை ஏற்படுத்தியுள்ளது. சிசிடிவி காட்சிகள் கைவசம் இருந்தபோதும் நிர்வாகம் ஏன் மௌனம் காத்தது, இதில் உள்ளூர் ஊழியர்கள் யாருக்கேனும் தொடர்பு உள்ளதா என்ற கோணங்களில் போலீசார் கடையின் மேலாளர் மற்றும் ஊழியர்களிடம் துருவித் துருவி விசாரணை நடத்தி வருவதுடன், சிசிடிவி காட்சிகளைக் கொண்டு தப்பியோடிய கொள்ளையனையும் தீவிரமாகத் தேடி வருகின்றனர்.