“கழுத்துல தழும்பு இருக்கே” திருமணமாகி 120 நாட்களிலேயே நேர்ந்த கொடூரம்… 18 வயது புதுப்பெண் கழுத்தில் காயங்களுடன் மர்ம மரணம் – கணவர் அதிரடி கைது..!!

உத்தரகண்ட் மாநிலம் நைனிடால் மாவட்டத்தில் உள்ள ராம்நகர் பகுதியில், 18 வயது இளம் புதுப்பெண் கோஹினூர் மர்மமான முறையில் உயிரிழந்த அதிர்ச்சிச் சம்பவம் நிகழ்ந்துள்ளது. ஜஸ்பூர் பகுதியைச் சேர்ந்த இவருக்கும், ராம்நகரைச் சேர்ந்த உவேஷ் என்பவருக்கும் கடந்த 4 மாதங்களுக்கு முன்புதான் (120 நாட்களுக்கு முன்) திருமணம் நடைபெற்றது. கடந்த வெள்ளிக்கிழமை மாலை, கோஹினூர் ஆபத்தான நிலையில் இருப்பதாகக் கூறி அவரது கணவர் வீட்டார் அங்குள்ள அரசு மருத்துவமனைக்குக் கொண்டு வந்துள்ளனர். ஆனால், அவரைப் பரிசோதித்த மருத்துவர்கள் அவர் ஏற்கனவே இறந்துவிட்டதாகத் தெரிவித்தனர்.

அவரது உடலைப் பரிசோதித்த மருத்துவர் ஷாரிக், பெண்ணின் கழுத்தில் ஆழமான காயங்கள் அல்லது தூக்குப்போட்டதற்கான தழும்புகள் இருப்பதை உறுதிசெய்தார். இது தற்கொலையாகவோ அல்லது கொலையாகவோ இருக்கலாம் என்ற சந்தேகம் எழுந்ததால் உடனடியாக போலீஸாருக்குத் தகவல் கொடுக்கப்பட்டது. மகளின் மரணச் செய்தி கேட்டு மருத்துவமனைக்கு விரைந்து வந்த கோஹினூரின் பெற்றோர் மற்றும் உறவினர்கள், அவரது உடலைப் பார்த்து கதறி அழுதனர்.

திருமணமான நாள் முதலே கோஹினூரை அவரது கணவர் வீட்டாரும், கணவனும் சேர்ந்து வரதட்சணைக்காகவோ அல்லது வேறு காரணங்களுக்காகவோ மன ரீதியாகவும் உடல் ரீதியாகவும் சித்திரவதை செய்து வந்ததாகப் பெண்ணின் தாயார் மற்றும் உறவினர்கள் குற்றம் சாட்டியுள்ளனர். அவர்கள் திட்டமிட்டே கோஹினூரைக் கொலை செய்துவிட்டு, தற்கொலை போல நாடகமாட முயல்கிறார்கள் என்று புகார் அளித்தனர். இதையடுத்து, தாசில்தார் மனிஷா மர்கானா முன்னிலையில் போலீஸார் கணவன் உவேஷைக் கைது செய்து தீவிர விசாரணை நடத்தி வருகின்றனர். பிரேதப் பரிசோதனை அறிக்கை வந்த பிறகே முழு உண்மையும் தெரியவரும் எனப் போலீஸார் கூறியுள்ளனர்