“உறங்கிய பெண்ணுக்கு பாலியல் தொல்லை..” விடுதிக்குள் நள்ளிரவில் புகுந்த எலக்ட்ரீசியனின் கொடூரம்… சென்னையில் பரபரப்பு..!!!

சென்னை வேளச்சேரியில் உள்ள பெண்கள் விடுதி ஒன்றில், அறையில் தோழியுடன் தூங்கிக் கொண்டிருந்த 27 வயது பெண்ணிடம் பாலியல் சீண்டலில் ஈடுபட்ட பிரதாப் இளவரசன் (22) என்ற எலக்ட்ரீசியனை போலீசார் கைது செய்து சிறையில் அடைத்தனர். அக்டோபர் 17-ஆம் தேதி அதிகாலை நடந்த இந்தச் சம்பவத்தின் போது, தூங்கிக்கொண்டிருக்கும் போது தன்னை யாரோ தொடுவது போன்ற உணர்வு ஏற்பட்டு விழித்த அப்பெண், அறையில் அடையாளம் தெரியாத நபர் இருப்பதைக் கண்டு அலறியுள்ளார். உடனே மற்ற மாணவிகளும் அக்கம் பக்கத்தினரும் திரண்டதால் அச்சமடைந்த அந்த நபர் அங்கிருந்து தப்பியோடி தலைமறைவானார். பாதிக்கப்பட்ட பெண்ணின் புகாரைத் தொடர்ந்து, இன்ஸ்பெக்டர் தலைமையில் தனிப்படை அமைக்கப்பட்டுத் தீவிர விசாரணை மேற்கொள்ளப்பட்டது.

விடுதி மற்றும் அப்பகுதியில் இருந்த சிசிடிவி காட்சிகளை ஆய்வு செய்த போலீசார், வேளச்சேரி சீதாபதி நகரில் உள்ள ஆண்கள் விடுதியில் தங்கியிருந்த கள்ளக்குறிச்சியைச் சேர்ந்த பிரதாப் இளவரசன் என்பவரைக் கைது செய்தனர். எலக்ட்ரீசியனாக வேலை பார்த்து வந்த அவர், பெண்கள் விடுதிக்குள் அத்துமீறி நுழைந்து இக்குற்றத்தில் ஈடுபட்டதை ஒப்புக்கொண்டதைத் தொடர்ந்து நீதிமன்ற உத்தரவின்படி சிறையில் அடைக்கப்பட்டார். இந்த அதிர்ச்சி தரும் சம்பவம், சென்னையில் உள்ள தனியார் விடுதிகளில் தங்கிப் படிக்கும் மற்றும் வேலைக்குச் செல்லும் பெண்களின் பாதுகாப்பு மற்றும் கண்காணிப்பு முறைகள் குறித்துப் பெரும் கேள்விக்குறியை எழுப்பியுள்ளது.