“காசு கொடுத்து வாங்குறோம்… இதுதான் தரமா..? ஸ்விகியில் முட்டை ஆர்டர் செய்த நபருக்குக் காத்திருந்த அதிர்ச்சி… இணையத்தில் தீயாய் பரவும் வீடியோ.. கொந்தளிக்கும் நெட்டிசன்ஸ்..!!

ஆன்லைன் உணவு மற்றும் மளிகைப் பொருட்கள் டெலிவரி தளமான ஸ்விகி இன்ஸ்டாமார்ட் மூலம் ஆர்டர் செய்யப்பட்ட முட்டைகள் அழுகிய நிலையில் டெலிவரி செய்யப்பட்டதாக எழுந்த குற்றச்சாட்டு, இணையத்தில் உணவுப் பாதுகாப்பு குறித்த பெரிய விவாதத்தை ஏற்படுத்தியுள்ளது. News18 இந்தியாவின் ஆலோசனையாளர் சுஷாந்த் சின்ஹா என்பவர் ‘X’ தளத்தில் பகிர்ந்துள்ள பதிவில், தான் ஆர்டர் செய்த ‘டாக்டர் ஹென்’ பிராண்ட் முட்டை ட்ரேயில் பெரும்பாலான முட்டைகள் பயன்படுத்த முடியாத அளவுக்கு அழுகிய நிலையில் இருந்ததாகக் கூறியுள்ளார். இதற்கான புகைப்படங்கள் மற்றும் வீடியோக்களைப் பகிர்ந்த அவர், டெலிவரி கட்டணங்கள் மற்றும் பிற கட்டணங்களைச் செலுத்திய பிறகும் நுகர்வோருக்கு இதுபோன்ற மோசமான பொருட்கள் எவ்வாறு வழங்கப்படுகின்றன என்று கேள்வி எழுப்பியுள்ளார்.

இந்த பதிவு சமூக வலைதளங்களில் விரைவாகப் பரவியதைத் தொடர்ந்து, பல பயனர்களும் தங்களுக்கு நேர்ந்த இதுபோன்ற அனுபவங்களைப் பகிர்ந்து கொண்டனர். ஒரு பயனர், அமேசான் நவ் மூலம் ‘டாக்டர் ஹென்’ முட்டைகளை ஆர்டர் செய்தபோதும் இதேபோன்று அழுகிய முட்டைகளே கிடைத்ததாகக் குறிப்பிட்டுள்ளார். மேலும் பலர், ஆன்லைன் தளங்களில் தரமற்ற பொருட்கள் கிடைக்கும்போது தங்களுக்குப் போதிய ஆதரவு கிடைக்காததால் வெளியில் புகாரளிப்பதில்லை என்று வேதனை தெரிவித்துள்ளனர். இதற்கிடையே, ஆன்லைனில் வாங்குவதற்குப் பதிலாக நேரில் சென்று பார்த்துப் பரிசோதித்து வாங்கக்கூடிய அருகில் உள்ள உள்ளூர் கடைகளிலேயே முட்டைகள் போன்ற அழுகும் பொருட்களை வாங்குவது சிறந்தது என்றும் சிலர் பரிந்துரைத்துள்ளனர்.

விரைவு-வணிக தளங்கள் மூலம் விரைவாகப் பொருட்களை விநியோகம் செய்வதில் காட்டப்படும் கவனம், பொருட்களின் தரம் மற்றும் பராமரிப்பில் காட்டப்படுவதில்லை என்பதை இச்சம்பவம் சுட்டிக்காட்டியுள்ளது. முட்டை போன்ற சீக்கிரமே கெட்டுப்போகும் உணவுப் பொருட்களை விநியோகச் சங்கிலி முழுவதும் சரியான வெப்பநிலையிலும் பாதுகாப்பாகவும் பராமரிப்பது அவசியமாகும். சில நிமிடங்களில் டெலிவரி செய்வதை விட, வாடிக்கையாளர்களுக்கு பழைய அல்லது பாழடைந்த பொருட்கள் சென்று சேராமல் தடுப்பதும், தரம் குறித்த புகார்களுக்கு உரிய தீர்வு காண்பதும் இத்தகைய ஆன்லைன் நிறுவனங்களின் முக்கிய பொறுப்பாகும் என்ற விவாதத்தை இந்த வைரல் பதிவு உருவாக்கியுள்ளது.