“என் பிள்ளை உயிரோடு வந்துவிடுவான்…” பாம்பு கடித்துத் துடித்த பச்சிளம் உயிர்.. மருத்துவமனைக்கு போகாமல் 20 மணி நேரமாக சடலத்தை வைத்து நடந்த மூடநம்பிக்கை நாடகம்..! கதற வைக்கும் சோகம்..!!

பீகார் மாநிலம் ககாரியா மாவட்டம் பர்பத்தா காவல் நிலையத்திற்குட்பட்ட சர்மா டோலா பகுதியில் மூடநம்பிக்கை தொடர்பான அதிர்ச்சியூட்டும் மற்றும் சோகமான சம்பவம் ஒன்று அரங்கேறியுள்ளது. விஷப்பாம்பு கடித்ததால் 10 வயது சிறுவன் பரிதாபமாக உயிரிழந்தான்; ஆனாலும், அவனது குடும்பத்தினர் சிறுவன் மீண்டும் உயிர் பெற்றுவிடுவான் என்ற மூடநம்பிக்கையின் அடிப்படையில் 20 மணி நேரத்திற்கும் மேலாக உடலை அருகில் வைத்து சடங்கு மற்றும் மந்திரவாதம் செய்யத் தொடங்கினர். கட்டிடத் தொழிலாளியான பம்பம் குமார் என்பவரின் 10 வயது மகன் சித்தார்த் குமார் என அடையாளம் காணப்பட்டுள்ள இந்தச் சம்பவம் ஒட்டுமொத்தப் பகுதியையும் உலுக்கியுள்ளது.

புதன்கிழமை மாலை நான்கரை மணியளவில், சித்தார்த் கிராமத்திலுள்ள பகவதி கோயில் அருகே விளையாடிக்கொண்டிருந்தபோது விஷப்பாம்பு அவனைக் கடித்தது. உடனடியாக மருத்துவமனைக்குக் கொண்டு செல்வதற்குப் பதிலாக, குடும்பத்தினர் உள்ளூர் அளவில் மந்திரவாதம் மற்றும் பூஜை செய்வதில் பொன்னான நேரத்தை வீணடித்தனர். சிறுவனின் உடல்நிலை மோசமடைந்ததை அடுத்து, அவனைப் பர்பத்தா சமூக சுகாதார நிலையத்திற்கு அழைத்துச் சென்றனர்; அங்கு பரிசோதித்த மருத்துவர் வினய் குமார் சிறுவன் ஏற்கனவே இறந்துவிட்டதாகத் தெரிவித்தார். மேலும், சரியான நேரத்தில் மருத்துவமனைக்குக் கொண்டு வந்திருந்தால் தடுப்பூசி (Anti-venom) செலுத்தி அவனது உயிரைக் காப்பாற்றியிருக்கலாம் என்றும் அவர் கூறினார்.

மருத்துவர்கள் இறந்துவிட்டதாக உறுதிப்படுத்திய பிறகும் குடும்பத்தினர் அதனை ஏற்றுக்கொள்ளவில்லை. மாறாக, கொல்கத்தா மற்றும் கதிஹாரைச் சேர்ந்த தாந்திரீக பாபாக்கள் வரும் வரை காத்திருந்து, உடலைக் கோயிலுக்கும் வீட்டிற்கும் மாற்றி மந்திரவாதம் செய்தனர். இறுதியில், காவல்துறையினரும் உள்ளூர் சமூகப் பெரியவர்களும் சம்பவ இடத்திற்கு விரைந்து வந்து குடும்பத்தினருக்கு அறிவியல் ரீதியான விழிப்புணர்வை ஏற்படுத்தி சமாதானப்படுத்தினர். அதன் பிறகு, வியாழக்கிழமை மதியம் மூன்று மணியளவில் காவல்துறையினர் உடலைக் கைப்பற்றி பிரேத பரிசோதனைக்காக ககாரியா சதர் மருத்துவமனைக்கு அனுப்பி வைத்தனர்.