“ஷூட்டிங்கில் இருந்து நேரா வந்து CM ஆன மாதிரி பேசுறாங்க…” அவதூறு பரப்புவோருக்குச் சட்டமன்றத்தில் முதல்வர் விஜய் கொடுத்த நெத்தியடி பதில்….!!

தமிழகத்தில் அண்மையில் நடந்து முடிந்த 17-வது சட்டமன்றத் தேர்தலில் வெற்றி பெற்று தமிழக வெற்றிக் கழகம் புதிய அரசாங்கத்தை அமைத்துள்ள சூழலில், இந்த ஆண்டின் முதல் கூட்டத்தொடர் கடந்த 18-ஆம் தேதி ஆளுநர் உரையுடன் முறைப்படி துவங்கியது. முந்தைய நாட்களில் மறைந்த முன்னாள் சட்டமன்ற உறுப்பினர்களுக்கு அஞ்சலி செலுத்தப்பட்டதைத் தொடர்ந்து, ஆளுநர் உரைக்கு நன்றி தெரிவிக்கும் விவாதத்தில் உதயநிதி ஸ்டாலின், எடப்பாடி பழனிசாமி, சவுமியா அன்புமணி மற்றும் பிரேமலதா விஜயகாந்த் உள்ளிட்ட முன்னணி எதிர்க்கட்சித் தலைவர்கள் பங்கேற்றுத் தங்களது கருத்துக்களைப் பதிவு செய்தனர்.

இக்கூட்டத்தொடரின் இறுதி நாளான இன்று, அவையில் உறுப்பினர்களின் பல்வேறு வினாக்களுக்கு விடையளித்துப் பேசிய முதலமைச்சர் ஜோசப் விஜய், தங்களுக்குப் பெரும்பான்மை வழங்கி அரியணையில் அமரவைத்த தமிழகப் பொதுமக்களுக்குத் தனது நெஞ்சார்ந்த நன்றியைத் தெரிவித்துக் கொண்டார்.

மேலும் தனது உரையில், திரைப்படப் படப்பிடிப்பிலிருந்து தாம் நேரடியாகச் சட்டமன்றத்திற்குள் நுழைந்தது போலச் சிலர் திட்டமிட்டுப் பொய்யான பிம்பத்தை உருவாக்குவதாகவும், அது வெறும் கற்பனையே தவிர உண்மைக்குச் புறம்பானது என்றும் அவர் சாடினார். தாம் தொடர்ந்து அரசியலைப் பேசி வந்ததால் தனது திரைப்படங்கள் சந்தித்த கடுமையான நெருக்கடிகளை ஒட்டுமொத்தத் தமிழகமும் அறியும் என்று குறிப்பிட்ட அவர், வெறும் எதிர்ப்பை மட்டுமே அரசியலாகக் காட்ட நினைக்கும் எதிர்க்கட்சியினருக்கு மத்தியில், மக்களின் இதயங்களில் இடம்பிடித்ததால் மட்டுமே தாம் முதலமைச்சர் என்ற  நிலையை எட்டியதாகக் கூறினார்.

அத்துடன், கரூரில் நேரிட்ட துயரச் சம்பவத்தில் 41 உயிர்களைப் பறிகொடுத்த வேதனையை வார்த்தைகளால் விவரிக்க முடியாது என்றும், இத்துயரத்திற்குத் தங்களின் மீதே பழி சுமத்தப்பட்ட கொடுமை மிக மோசமானது என்றும் முதலமைச்சர் விஜய் தனது உரையில் வேதனையுடன் குறிப்பிட்டார்.