அடப்பாவிங்ளா..! காலில் லேசாக உரசிய ஸ்கூட்டி.. நொடியில் ரத்தக் களறியான பிறந்தநாள் பார்ட்டி… பதறவைக்கும் சம்பவம்..!!

உத்தரப் பிரதேச மாநிலம் நொய்டாவின் ஃபேஸ்-1 காவல் நிலையத்திற்கு உட்பட்ட நாயாபான்ஸ் கிராமத்தில், பிறந்தநாள் பார்ட்டியின் போது நடந்த சாதாரண தகராறு கொடூரமான மோதலாக மாறியது. அங்கு ஸ்கூட்டர் உரசியது தொடர்பான விவகாரத்தில் இரு தரப்பினருக்கும் இடையே ஏற்பட்ட மோதலில் 25 வயது இளைஞர் கொல்லப்பட்டார், மேலும் மற்றொருவர் படுகாயமடைந்தார். இந்தச் சம்பவத்தைத் தொடர்ந்து குற்றவாளிகள் அங்கிருந்து தப்பியோடிவிட்டனர்.

சம்பவத்தன்று நாயாபான்ஸ் கிராமத்திற்கு அருகிலுள்ள பூங்கா ஒன்றில் சில இளைஞர்கள் பிறந்தநாள் கொண்டாட்டத்தில் ஈடுபட்டிருந்தனர். அந்த வழியாகச் சென்ற அமித் மற்றும் அவரது நண்பர்களின் ஸ்கூட்டர், அங்கிருந்த ஒருவரின் காலில் தற்செயலாக உரசியது. இதனால் இரு தரப்பினருக்கும் இடையே வாக்குவாதம் ஏற்பட்டு, அது சிறிது நேரத்தில் கடுமையான கைகலப்பாக மாறியது. இந்தத் தாக்குதலில் 25 வயதான அமித் மற்றும் அவரது நண்பர் சிவம் ஆகியோருக்குத் தலையில் பலத்த காயம் ஏற்பட்டது. உடனடியாக அவர்களின் நண்பர்கள் அவர்களை மருத்துவமனைக்கு அழைத்துச் சென்றனர், அங்கு அமித் ஏற்கனவே இறந்துவிட்டதாக மருத்துவர்கள் தெரிவித்தனர். மற்றொரு காயமடைந்தவரான சிவம் மேல்சிகிச்சைக்குப் பிறகு தற்போது அபாய கட்டத்தைத் தாண்டிவிட்டதாகக் கூறப்படுகிறது.

இந்தச் சம்பவம் குறித்துத் தகவல் அறிந்ததும் ஃபேஸ்-1 காவல் நிலையப் போலீசார் உடனடியாக வழக்குப் பதிவு செய்து விசாரணையைத் தொடங்கினர். உயிரிழந்த இளைஞரின் உடல் உடற்கூறாய்வுக்காக அனுப்பி வைக்கப்பட்டுள்ளது. தலைமறைவான குற்றவாளிகளைப் பிடிக்க நான்கு தனிப்படை காவல் குழுக்கள் அமைக்கப்பட்டுள்ளன. இந்த வழக்கில் முக்கியக் குற்றவாளியான ஆப்தாப் என்பவர் மீது ஏற்கனவே பல குற்ற வழக்குகள் உள்ளதாகவும், அவர் இதற்கு முன்பும் ஜெயிலுக்குச் சென்றுள்ளதாகவும் போலீசார் தெரிவித்துள்ளனர். விரைவில் குற்றவாளிகள் கைது செய்யப்படுவார்கள் எனவும் காவல்துறை தரப்பில் தெரிவிக்கப்பட்டுள்ளது.