“வெளியே செருப்பு… ஆஃப் செய்யப்பட்ட CCTV!” நள்ளிரவில் ஆபீசுக்குள் சடலமாக மீட்கப்பட்ட 20 வயது மகள்—தாய் கண்ட அதிர்ச்சி காட்சி..!!

உத்தரப் பிரதேச மாநிலம் கோரக்பூரில் உள்ள தனியார் நிதி நிறுவனம் ஒன்றில் பணியாற்றி வந்த நிங்கி (20) என்ற இளம்பெண், அலுவலகத்திற்குள்ளேயே தூக்கில் தொங்கிய நிலையில் சடலமாக மீட்கப்பட்ட சம்பவம் பெரும் அதிர்ச்சியை ஏற்படுத்தியுள்ளது. சனிக்கிழமை இரவு நீண்ட நேரமாகியும் மகள் வீடு திரும்பாததால் தேடிச் சென்ற தாயார் விமலா, அலுவலகத்திற்கு வெளியே மகளின் செருப்புகளும் ஸ்கூட்டரும் இருப்பதைக் கண்டுள்ளார். அலுவலகத்தின் ஷட்டர் திறந்திருந்த நிலையில் உள்ளே சென்று பார்த்தபோது, மகள் சடலமாகத் தொங்குவதைக் கண்டு அவர் அதிர்ச்சியில் உறைந்தார்.

இளம்பெண்ணின் மரணத்தில் மர்மம் இருப்பதாகக் கூறும் குடும்பத்தினர், இது தற்கொலை அல்ல என்றும், அவர் கொலை செய்யப்பட்டிருக்கலாம் என்றும் குற்றம்சாட்டியுள்ளனர். குறிப்பாக, இந்த மரணத்திற்கு அந்த நிதி நிறுவனத்தின் மேலாளர் சூரஜ் யாதவ்தான் காரணம் என்று அவரது பெற்றோர் நேரடியாகப் புகார் அளித்துள்ளனர். மேலும், சம்பவம் நடந்த நேரத்தில் அலுவலகத்தில் இருந்த சிசிடிவி (CCTV) கேமராக்கள் அனைத்தும் அணைக்கப்பட்டிருந்ததாகக் கூறப்படும் தகவல், இந்த வழக்கின் மீதான சந்தேகத்தை மேலும் வலுப்படுத்தியுள்ளது.

மரணத்தில் சந்தேகம் இருப்பதாகக் கூறி ஞாயிற்றுக்கிழமை காலை நிங்கியின் உறவினர்களும் கிராம மக்களும் அலுவலகத்தின் முன்பு திரண்டு தீவிர போராட்டத்தில் ஈடுபட்டனர். இதுகுறித்து கோரக்நாத் பகுதி காவல் அதிகாரி ரவி குமார் சிங் கூறுகையில், பிரேதப் பரிசோதனை அறிக்கை வந்த பிறகே மரணத்திற்கான உண்மையான காரணம் தெரியவரும் என்றும், குடும்பத்தினரின் புகார்கள் மற்றும் சிசிடிவி அணைக்கப்பட்டது உள்ளிட்ட அனைத்து அம்சங்களையும் காவல்துறையினர் தீவிரமாக விசாரித்து வருவதாகவும் தெரிவித்துள்ளார்.