“உன்னை இங்கேயே விட்டுட்டு போகவா..?” விமான நிலையத்தில் ஊழியரை அவமானப்படுத்திய மேக்கப் ஆர்ட்டிஸ்ட்… இணையத்தில் கொந்தளிக்கும் நெட்டிசன்கள்..!!

சமீபத்தில் சமூக வலைதளங்களில் வைரலாகி வரும் ஒரு வீடியோ இணையத்தில் பெரும் விவாதத்தைக் கிளப்பியுள்ளது. பிரபல செலிபிரிட்டி மேக்கப் ஆர்ட்டிஸ்ட் மற்றும் இன்ஃப்ளூயன்ஸரான லீனா பூஷன், விமான நிலையத்தில் தனது குழுவைச் சேர்ந்த ஒரு பெண் ஊழியரைப் பகிரங்கமாகக் கண்டித்து, அவமானப்படுத்தும் வகையில் வீடியோ ஒன்றை வெளியிட்டுள்ளார். இந்த வீடியோ வெளியானதிலிருந்து, இன்ஃப்ளூயன்ஸரின் இந்தச் செயல் மிகவும் இரக்கமற்றது, சுரண்டல் மனப்பான்மை கொண்டது மற்றும் வர்க்கப் பாகுபாட்டைக் காட்டுவது என இணையவாசிகள் கடுமையாக விமர்சித்து வருகின்றனர்.

விமான நிலையத்தில் நடந்த இந்தச் சம்பவத்தில், லீனா பூஷனின் உதவி ஊழியராகப் பணியாற்றும் மஹக் என்ற பெண் இடம்பெற்றுள்ளார். மஹக் முதன்முறையாக விமானத்தில் பயணம் செய்ததால், பேக்கிங் செய்யும்போது கைப்பைக்கு பதிலாகச் செக்-இன் லக்கேஜில் பேட்டரிகளை வைத்து சிறிய தவறு செய்துவிட்டார். இதற்காக லீனா பூஷன் அவரை கேமரா முன்னால் அழைத்து, “என்னவெல்லாம் பேக் செய்து கொண்டு வந்திருக்கிறாய்? உனக்கு என்ன இன்டர்வியூவா நடக்கிறது? கைப்பையில் வைக்க வேண்டிய பேட்டரிகளை எல்லாம் லக்கேஜில் வைத்துள்ளாய், உன்னை இங்கேயே விட்டுட்டுப் போகட்டுமா?” எனக் கிண்டலாகவும் கோபமாகவும் கேலி செய்துள்ளார். பயத்தின் காரணமாக அந்தப் பெண் கேமரா முன் மிகவும் சங்கடப்பட்டு அமைதியாக நிற்பது வீடியோவில் தெரிகிறது.

இந்த வீடியோ இன்ஸ்டாகிராமில் இருந்து எக்ஸ் உள்ளிட்ட பிற தளங்களில் பரவியதை அடுத்து, நெட்டிசன்களின் கோபம் வெடித்தது. ஒரு சிறிய தவறுக்காக ஒருவரைப் பகிரங்கமாக அல்லது கேமரா முன்னிலையில் அவமானப்படுத்துவது முற்றிலும் தவறானது என்று மக்கள் கொந்தளித்து வருகின்றனர். வேலை போய்விடும் என்ற பயத்தில் அந்தப் பெண்ணால் எதுவும் பேச முடியவில்லை என்றும், அவரது அந்த இயலாமையை இன்ஃப்ளூயன்ஸர் தனக்குச் சாதகமாகப் பயன்படுத்திக் கொண்டார் என்றும் விமர்சிக்கின்றனர். அந்தப் பெண்ணின் முகத்தில் தெரிந்த பயம் லீனா பூஷனின் இந்த மோசமான மற்றும் கொடூரமான நடத்தையை வெளிச்சம்போட்டுக் காட்டுவதாக இணையவாசிகள் கருத்து தெரிவித்து வருகின்றனர்.