ரெடியா.? பதவியை ராஜினாமா செஞ்சுட்டு நில்லுங்க.. ஒரு கல்லூரிப் பெண்ணை வச்சு உங்களைத் தோற்கடிப்போம்.. இபிஎஸ்-க்கு நேரடி சவால் விடுத்த ஆதவ் அர்ஜுனா…!!

மதுராந்தகத்தில் நடைபெற்ற தவெக பூத் கமிட்டி உறுப்பினர்கள் கூட்டத்தில் பேசிய பொதுப்பணித்துறை அமைச்சர் ஆதவ் அர்ஜுனா, தான் சட்டமன்றத்தில் ஒரு அமைச்சராகப் பேசுவதை விட தவெக தொண்டனாகப் பேசுவதையே பெருமையாகக் கருதுவதாகக் குறிப்பிட்டுள்ளார். சட்டமன்றத்தில் தான் பேச முற்படும் போதெல்லாம் ‘புரோட்டோகால்’ என்ற பெயரில் எதிர்க்கட்சியினர் தன்னைத் தடுக்க முயல்வதாகவும், அடுத்த முறை தான் மூச்சு விட்டால் கூட அவர்கள் கத்த ஆரம்பித்துவிடுவார்கள் என்றும் அவர் விமர்சித்துள்ளார்.

மேலும், 75 ஆண்டுகாலப் பாரம்பரியம் மிக்க ஆலமரம் என்று தங்களைப் பறைசாற்றிக் கொண்ட திமுகவினர், தங்களுக்கு மட்டுமே அரசியல் தெரியும் என்ற பாணியில் சட்டமன்றத்திற்கு வந்ததாக ஆதவ் அர்ஜுனா சாடியுள்ளார். ஆனால், கூட்டத் தொடர் முடியும் தருவாயிலும், தவெக முதல்வர் அவைக்கு வரும்போதும் அவர்கள் யாரும் அங்கிருப்பதில்லை என்றும், முதல்வரைப் பேசுமாறு கூறிவிட்டுப் பின்னர் அவையை விட்டு வெளியேறி விடுவதாகவும் குற்றம் சாட்டியுள்ளார். வரவிருக்கும் இடைத்தேர்தலில் திமுகவினர் 5,000 ரூபாயும் தீபாவளி ஆடையும் எடுத்துக்கொண்டு ஓட்டுக்குப் பணம் கொடுக்க வருவார்கள் என்றும், மக்கள் அந்தப் பணத்தைப் பெற்றுக்கொண்டு தவெகவின் விசில் சின்னத்திற்கு வாக்களிக்க வேண்டும் என்றும் கேட்டுக்கொண்டுள்ளார்.

அதிமுக பொதுச்செயலாளர் எடப்பாடி பழனிசாமியின் விமர்சனங்களுக்குப் பதிலடி கொடுத்த அவர், தவெகவிடம் பணம் வாங்கிக்கொண்டு யாரும் ராஜினாமா செய்யவில்லை என்று திட்டவட்டமாக மறுத்துள்ளார். எடப்பாடி தொகுதியில் தவெகவின் விசில் சின்னம் நின்றிருந்தால் இபிஎஸ் தோற்றிருப்பார் என்றும், மதுராந்தகத்தில் பிரசாரம் செய்ய வரும் அவர் தனது பதவியை ராஜினாமா செய்துவிட்டு எடப்பாடியில் மீண்டும் நிற்கட்டும் என்றும் சவால் விடுத்துள்ளார். அங்கு அவருக்கு எதிராக ஒரு சாதாரணக் கல்லூரிப் பெண்ணை நிறுத்தி தவெக அவரைத் தோற்கடிக்கும் என்றும், இன்றைய அதிமுகவின் நிலைமை அவ்வளவுதான் என்றும் அவர் விவரித்துள்ளார்.

இறுதியாக, கடந்த தேர்தலில் அதிமுக பெற்ற வாக்குகள் அனைத்தும் இரட்டை இலை சின்னத்திற்காக விழுந்தவை என்றும், தற்போது மக்கள் இரட்டை இலையையும் விசில் சின்னத்தையும் ஒன்றாகவே பார்க்கத் தொடங்கிவிட்டனர் என்றும் ஆதவ் அர்ஜுனா சுட்டிக்காட்டியுள்ளார். எம்.ஜி.ஆர் மற்றும் ஜெயலலிதாவின் ஆன்மாக்கள் தற்போது விசில் சின்னத்தில்தான் குடியிருக்கின்றன என்று கூறிய அவர், திமுகவை எதிர்த்து அரசியல் செய்யும் ஒற்றை வலிமை முதலமைச்சர் விஜய்க்கு மட்டுமே உள்ளது என்றும், எடப்பாடி பழனிசாமியின் கையில் இருக்கும் இரட்டை இலை சின்னத்தின் சகாப்தம் முடிந்துவிட்டது என்றும் மிகத் தீவிரமாக முழங்கியுள்ளார்.