2029 இல் விஜய்யின் ஜாதகத்தில் பிரதமர் யோகம்… கணித்த ஜோதிடர் ரிக்கி ரத்தன் பண்டிட்.. வெற்றி டிவி நேர்காணலால் அரசியல் வட்டாரத்தில் பரப்பரப்பு..!!

தமிழக முதலமைச்சர் விஜய், வரும் 2029ஆம் ஆண்டு நடைபெறவிருக்கும் மக்களவைத் தேர்தலில், தென்மாநிலங்களில் இருந்து 60 நாடாளுமன்ற உறுப்பினர்களுடன் (எம்.பி.) நாட்டின் பிரதமர் ஆவார் என்று அவரது ஜோதிடர் ரிக்கி ரத்தன் பண்டிட் கணித்திருப்பதாக அதிரடித் தகவல்கள் வெளியாகியுள்ளன. தமிழகத்தில் ஆட்சிப் பொறுப்பை ஏற்ற பிறகு, அடுத்தகட்டமாக தேசிய அரசியலிலும் தவெக தடம் பதிக்கப் போகிறது என்ற ரீதியில் வெளியாகியுள்ள இந்தத் தகவல் அரசியல் வட்டாரத்தில் பெரும் பரபரப்பை ஏற்படுத்தியுள்ளது.

தமிழக வெற்றிக் கழகத்தின் அதிகாரப்பூர்வ தொலைக்காட்சியான ‘வெற்றி தொலைக்காட்சி’ சேனலின் நிர்வாக இயக்குநர் சிங்காரவடிவேலன் அண்மையில் அளித்த நேர்காணல் ஒன்றில் இத்தகவலை அதிகாரப்பூர்வமாகப் பகிர்ந்துள்ளார். 2026 சட்டமன்றத் தேர்தல் வெற்றியைத் தொடர்ந்து, கட்சியின் அடுத்த இலக்கு 2029 மக்களவைத் தேர்தல்தான் என்றும், அதில் தென்மாநிலங்களில் தவெக கூட்டணி மிகப்பெரிய அலையை ஏற்படுத்தும் என்றும் அவர் அந்த நேர்காணலில் சுட்டிக்காட்டியுள்ளார்.

முதலமைச்சர் விஜய்யின் ஜாதகம் மற்றும் கிரக நிலைகளை ஆராய்ந்த ஜோதிடர் ரிக்கி ரத்தன் பண்டிட், 2029-ஆம் ஆண்டு தவெக கட்சி தென்மாநிலங்கள் முழுவதும் பரவலாகப் போட்டியிட்டு 60 மக்களவை இடங்களைக் கைப்பற்றும் என்றும், அதன் மூலம் விஜய் இந்தியாவின் பிரதமர் நாற்காலியில் அமருவார் என்றும் மிகத் துல்லியமாகக் கணித்துள்ளதாக சிங்காரவடிவேலன் விவரித்துள்ளார். சமூக வலைதளங்களில் தற்பொழுது இந்த நேர்காணல் வீடியோ தவெக தொண்டர்களால் மிக வேகமாகப் பகிரப்பட்டு வருகிறது.