“இந்தியாவை தப்பா நினைச்சுட்டேன்.. ஐரோப்பாவே தோத்துடும்..!” இந்திய ஸ்லீப்பர் பஸ்ஸைப் பார்த்து வாயடைத்துப்போன பிரிட்டிஷ் பயணி..!!

பிரிட்டனைச் சேர்ந்த டிஜிட்டல் கண்டென்ட் கிரியேட்டரான ஜாக் ஹீட்டன் என்பவர் இந்தியாவுக்குச் சுற்றுலா வந்துள்ளார். கடந்த மூன்றரை மாதங்களில் அவர் இந்தியாவின் ஆறு மாநிலங்களுக்குச் சென்று தனது அனுபவங்களை இன்ஸ்டாகிராமில் பகிர்ந்து வருகிறார். சமீபத்தில் அவர் டெல்லியிலிருந்து ஜெய்ப்பூருக்கு ‘ஜிங் பஸ்’ நிறுவனத்தின் ஸ்லீப்பர் பஸ் மூலம் பயணம் செய்தார். இந்த பயண அனுபவம் அவரை மிகவும் கவர்ந்ததாகவும், ஐரோப்பிய பஸ் சேவைகளை விட இந்தியாவின் பஸ் சேவைகள் பல விஷயங்களில் சிறந்து விளங்குவதாகவும் அவர் நெகிழ்ச்சியுடன் தெரிவித்துள்ளார்.

சுமார் 52 வினாடிகள் கொண்ட தனது வீடியோவில், பஸ்ஸின் நவீன மற்றும் தூய்மையான உட்புற அமைப்பை அவர் காட்டுகிறார். பஸ்ஸில் படுத்து உறங்குவதற்கும் ஓய்வெடுப்பதற்கும் அதிக இடம் இருந்ததாகவும், நீண்ட தூர பயணத்திற்கு இது மிகவும் வசதியாக இருந்ததாகவும் கூறுகிறார். மேலும் பஸ்ஸில் வழங்கப்பட்ட பருப்பு, காய்கறி, கறி, சாதம், ரொட்டி மற்றும் குலாப் ஜாமுன் அடங்கிய உணவு மிகவும் சுவையாக இருந்ததாகவும், இது பல உணவகங்களின் உணவையே தோற்கடித்துவிடும் என்றும் பாராட்டியுள்ளார். பஸ்ஸில் இருந்த கழிவறை மற்றும் சிங்க் ஆகியவை மிகவும் சுத்தமாக பராமரிக்கப்பட்டிருந்ததையும் அவர் சுட்டிக்காட்டினார்.

https://www.instagram.com/reel/DbLRm0Ayc0P/?utm_source=ig_web_button_share_sheet

பொதுவாக நீண்ட தூர பஸ் பயணங்களை விரும்பாத அவருக்கு, சுமார் 7 மணி நேரம் நீடித்த இந்த டெல்லி-ஜெய்ப்பூர் பயணம் மிகவும் நிம்மதியானதாகவும் மகிழ்ச்சியானதாகவும் அமைந்தது. இந்த அனைத்து வசதிகளுடன் கூடிய பயணத்திற்கான கட்டணம் வெறும் 4 டாலருக்கும் குறைவுதான். இவ்வளவு குறைந்த கட்டணத்தில் இத்தகைய உயர்தர வசதிகள் கிடைப்பது ஒரு சிறந்த அனுபவம் என்று அவர் கூறியுள்ளார். ஆரம்பத்தில் விமான உணவு போல சாதாரண உணவாக இருக்கும் என்று நினைத்ததாகவும், ஆனால் ருசித்துப் பார்த்த பிறகு தனது எண்ணம் முற்றிலும் மாறிவிட்டது என்றும் கூறி இந்த பயணத்தின் நினைவுகளைப் பகிர்ந்துள்ளார்.