2.5 லட்ச ரூபாய் ரூம் ரெண்ட்… டிரைவருக்கு லண்டன் டூர்… சுயநலச் சந்திப்பும்… சோபா அரசியலும்.. விஜய்-அஜித் கூட்டணியைக் கிழித்துத் தொங்கவிட்ட ஜேம்ஸ் வசந்த..!!

தமிழக வெற்றிக் கழகத்தின் 25 நாள் ஆட்சி நிர்வாகம், முதலமைச்சரின் லண்டன் பயணம் மற்றும் விஜய்–அஜித் சந்திப்பு ஆகியவற்றின் பின்னணியில் உள்ள அரசியல் சுயநலன்கள் குறித்து இசையமைப்பாளரும் அரசியல் விமர்சகருமான ஜேம்ஸ் வசந்தன் கடுமையான விமர்சனங்களை முன்வைத்துள்ளார். ‘The TN Voice’ யூடியூப் சேனலுக்கு அளித்துள்ள பிரத்யேகப் பேட்டியில், தவெக அரசு மக்கள் வரிப்பணத்தை விரயம் செய்வதாகவும், தேர்தல் வாக்குறுதிகளை நிறைவேற்றாமல் விளம்பர அரசியலில் ஈடுபடுவதாகவும் அவர் சுட்டிக்காட்டியுள்ளார்.

முதலமைச்சர் விஜய்யின் லண்டன் பயணம் குறித்துப் பேசிய ஜேம்ஸ் வசந்தன், அது தொழில் முதலீடுகளை ஈர்ப்பதற்கான அரசுப் பயணம் அல்ல, மாறாக அரசு செலவில் மேற்கொள்ளப்பட்ட தனிப்பட்ட சுற்றுலா என்று சாடியுள்ளார். “முதலீடுகளை ஈர்க்கச் செல்லும் பயணத்தில் தொழில்துறை அமைச்சரோ அல்லது ஐஏஎஸ் அதிகாரிகளோ உடன் செல்லாமல், விளையாட்டுத்துறை அமைச்சரையும் தனது சொந்தக் கார் டிரைவரையும் முதலமைச்சர் அழைத்துச் சென்றுள்ளார். லண்டன் ஸ்டார் ஹோட்டலில் ஒரு அறைக்கு நாளொன்றுக்கு ₹2.5 லட்சம் வீதம் 14 பேருக்கு மக்கள் வரிப்பணம் கோடிக்கணக்கில் விரயம் செய்யப்படுகிறது. கஜானாவில் பணமில்லை என்று கூறிவிட்டு, மேட்டூர் அணைத் திறப்பிற்கு ₹6 கோடியைச் செலவழிக்கும் அரசு, தூய்மைப் பணியாளர்களுக்கு நாளொன்றுக்கு ₹850 ஊதிய உயர்வு வழங்க மறுப்பது அப்பட்டமான ஏமாற்று வேலை” என்று அவர் குற்றம் சாட்டியுள்ளார்.

முன்னாள் ஆளுங்கட்சியை வாரிசு அரசியல் என்று விமர்சித்த விஜய், தற்போது தனது கார் டிரைவரின் மகனை எம்எல்ஏ ஆக்கியிருப்பதும், டிரைவரை அரசு செலவில் லண்டனுக்கு அழைத்துச் சென்றிருப்பதும் வாரிசு அரசியலின் மற்றொரு வடிவமே என்றும், இது அதிகார துஷ்பிரயோகம் என்றும் அவர் குறிப்பிட்டுள்ளார். மேலும், விஜய்–அஜித் சந்திப்பு குறித்துப் பேசிய அவர், “அரசியலில் அஜித்தின் ரசிகர்களைக் கவர்ந்து வரவிருக்கும் இடைத்தேர்தலில் வாக்குகளை அறுவடை செய்ய விஜய் நட்புக் கரம் நீட்டுகிறார்; மறுபுறம் கார் ரேஸ் போட்டிகளுக்கான அரசின் சலுகைகளைப் பெற அஜித் இந்த சந்திப்பைப் பயன்படுத்துகிறார். இருவருமே சுயநலத்திற்காகச் செயல்படுவதால், இளைஞர்கள் நடிகர்களின் பின்னால் சென்று வாழ்க்கையை வீணடிக்காமல் பொதுநலத் தலைவர்களைப் பின்பற்ற வேண்டும்” என்று அறிவுறுத்தியுள்ளார்.

இறுதியாக, தவெக அரசின் மீதான மக்கள் அதிருப்தி குறித்துப் பேசிய ஜேம்ஸ் வசந்தன், கடந்த தேர்தலில் தவெகவுக்கு வாக்களித்த 35% மக்களில் 15% முதல் 20% வரை இப்போது ஏமாற்றமடைந்து புலம்பத் தொடங்கிவிட்டதாகக் கூறியுள்ளார். “பதவியேற்ற 25 நாட்களிலேயே 2 தவெக எம்எல்ஏக்கள் ராஜினாமா செய்துவிட்டு ஆளும்கட்சியில் இணைந்தது பேரதிர்ச்சியாகும். போதிய மெஜாரிட்டி இல்லாததால் ஆட்சியைத் தக்கவைக்கப் பிற கட்சி அலுவலகங்களுக்குச் சோபா அனுப்பி ஆதரவு கோரியதன் பின்னணியில் பெரும் கேள்வி உள்ளது. சமூக ஊடகங்களில் போலி பிம்பத்தைக் கட்டமைக்க முயன்றாலும் இவர்கள் தகுதியற்றவர்கள் என்பதை மக்கள் உணர ஆரம்பித்துவிட்டனர். இந்த அதிருப்தியும் ஆதரவு சரிவும் வரவிருக்கும் மதுராந்தகம், தாராபுரம் இடைத்தேர்தல் முடிவுகளில் நிச்சயம் எதிரொலிக்கும்” என்று அவர் அதிரடியாகத் தெரிவித்துள்ளார்.