LATEST NEWS
“என் குழந்தையின் மூச்சு நின்னுட்டு இருக்கு… கொஞ்சம் வழி விடுங்க…” ஒன்றரை மணி நேரம் டிராஃபிக்கில் சிக்கிய ஆம்புலன்ஸ்… தாயின் மடியிலேயே பிரிந்த 8 மாதக் குழந்தையின் உயிர்..!!
மகாராஷ்டிர மாநிலம் ராய்கட் பகுதியில் நெஞ்சை உலுக்கும் சம்பவம் ஒன்று நிகழ்ந்துள்ளது. ஒரு தாய் தனது குழந்தையை மடியில் வைத்துக்கொண்டு வழிவிடுமாறு கெஞ்சியபடியும், தந்தை ஆம்புலன்ஸ் செல்வதற்காக போக்குவரத்து நெரிசலைச் சரிசெய்ய முயன்றபடியும் இருந்தும் எந்தப் பலனும் இல்லாமல், ஒன்றரை மணி நேரத்திற்குப் பிறகும் ஆம்புலன்ஸ் போக்குவரத்து நெரிசலில் இருந்து வெளியே வர முடியவில்லை; அதற்குள் எட்டு மாதக் குழந்தை தாயின் மடியிலேயே துடித்து உயிரிழந்தது. ராய்கட்டின் பாமன்காவ் பகுதியைச் சேர்ந்த சுஷில் தாக்கூரின் 8 மாதக் குழந்தை விளையாடும்போது பலூனை விழுங்கியதால் உடல்நிலை மோசமானது; குடும்பத்தினர் தாமதிக்காமல் ஆம்புலன்ஸ் மூலம் அலிபாக் மாவட்ட பொது மருத்துவமனைக்குக் கொண்டு செல்ல முயன்றபோது நெரிசலில் சிக்கிக்கொண்டனர்.
பெல்கடே – அலிபாக் சாலையில் சாலைப் பணிகள் நடைபெற்று வருவதால் கடும் போக்குவரத்து நெரிசல் ஏற்பட்டிருந்தது; அந்த நெரிசலில் குழந்தையை ஏற்றிச் சென்ற ஆம்புலன்ஸும் சிக்கியது. தந்தை தொடர்ந்து மக்களிடம் வழிவிடுமாறு மன்றாடியபோதும் ஆம்புலன்ஸுக்கு வழி கிடைக்கவில்லை. பெரும் போராட்டத்திற்குப் பிறகு இரண்டு மணி நேரத்திற்குப் பின் பிற்பகல் சுமார் 4 மணியளவில் ஆம்புலன்ஸ் மருத்துவமனையை அடைந்தது; ஆனால் பரிசோதித்த மருத்துவர்கள் குழந்தை ஏற்கனவே இறந்துவிட்டதாக அறிவித்தனர்.
அலிபாக் மற்றும் முருட் இடையே மகாராஷ்டிர மாநில உள்கட்டமைப்பு மேம்பாட்டுக் கழகம் சார்பில் சாலை அமைக்கப்பட்டு வருவதால், அங்கு நாள்தோறும் கடும் போக்குவரத்து நெரிசல் ஏற்படுகிறது; இருப்பினும் அவசரகால வாகனங்கள் செல்ல எந்த மாற்று ஏற்பாடும் செய்யப்படவில்லை. விதிமுறைப்படி கட்டம் கட்டமாக ஒருவழிப் போக்குவரத்தை அனுமதித்து வாகனங்களைச் சீராக இயக்கியிருக்க வேண்டும், ஆனால் சம்பந்தப்பட்ட துறை சாலையை முழுமையாக மூடிவிட்டுப் பணியைத் தொடங்கிவிட்டது. போக்குவரத்து நெரிசலில் சிக்கியதாலேயே குழந்தை உயிரிழந்ததாகவும், வழி கிடைத்திருந்தால் குழந்தையின் உயிர் பிழைத்திருக்கும் என்றும் தந்தை தெரிவித்துள்ளார்; சாலைப் பணிகளின்போது அவசர சேவைகளுக்கு ஏன் வழி விடப்படவில்லை என்ற கேள்வி எழுந்துள்ள நிலையில், இந்தத் துயரச் சம்பவத்தால் உள்ளூர் மக்களிடையே கடும் கொந்தளிப்பு ஏற்பட்டுள்ளது.
