காப்பாற்றுங்கள்… இல்லையேல் கருணைக் கொலை செய்யுங்கள்..! குடியரசுத் தலைவரிடம் கதறும் இளம் தாய்மார்கள்..! பின்னணி என்ன..?!

ராஜஸ்தான் மாநிலம் கோட்டாவில் உள்ள அரசு மருத்துவக் கல்லூரி மருத்துவமனையில், கடந்த மே மாதத்தில் சிசேரியன் பிரசவம் செய்துகொண்ட ஐந்து பெண்கள், மருத்துவ அலட்சியம் மற்றும் தரமற்ற மருந்துகளின் பயன்பாடு காரணமாக தங்களது இரண்டு சிறுநீரகங்களின் செயல்பாட்டையும் முழுமையாக இழந்துள்ளனர். ஒரு புதிய உயிரை வரவேற்கும் தங்களின் மகிழ்ச்சியான தருணம், தங்களின் வாழ்க்கையையே அச்சுறுத்தும் ஒரு முடிவில்லாத வேதனையாக மாறும் என்று அவர்கள் நினைத்துக்கூட பார்க்கவில்லை. தற்போது வாரத்திற்கு பலமுறை கடுமையான டயாலிசிஸ் சிகிச்சையை மட்டுமே நம்பி, மூச்சுத்திணறல் உள்ளிட்ட தீவிர உடல்நலக் கோளாறுகளுடன் அவர்கள் உயிருக்குப் போராடி வருகின்றனர்.

உடலளவிலும், மனதளவிலும், பொருளாதார ரீதியிலும் முற்றிலும் சிதைந்துபோன இந்த பெண்கள் மற்றும் அவர்களின் குடும்பத்தினர் தங்களுக்கு நியாயம் கேட்டு மாவட்ட ஆட்சியர், நாடாளுமன்ற உறுப்பினர் மற்றும் முதலமைச்சர் வரை முறையிட்டும் முறையான மருத்துவ அல்லது நிதி உதவி கிடைக்கவில்லை. இதனால் வேதனையின் விளிம்பிற்குச் சென்ற இப்பெண்கள், இந்திய குடியரசுத் தலைவர் திரௌபதி முர்முவுக்கு ஒரு உருக்கமான கருணை மனுவை அனுப்பியுள்ளனர். அதில், தங்களுக்கு அவசரமாக சிறுநீரக மாற்று அறுவை சிகிச்சை செய்ய அரசு உடனே ஏற்பாடு செய்ய வேண்டும், இல்லையெனில் தங்களை இந்த தீரா துயரிலிருந்து விடுவித்து “கருணைக் கொலை” செய்ய அனுமதி அளிக்க வேண்டும் என்று கண்ணீருடன் கோரிக்கை விடுத்துள்ளனர்.

இந்த விவகாரம் நாடு முழுவதும் பெரும் அதிர்ச்சியை ஏற்படுத்தியுள்ள நிலையில், ராஜஸ்தான் மருத்துவ சேவைகள் கழகம் வழங்கிய போலி அல்லது தரமற்ற மருந்துகள் மற்றும் அறுவை சிகிச்சை அரங்கில் ஏற்பட்ட தொற்று காரணமாகவே இந்த நிலை ஏற்பட்டதாக பாதிக்கப்பட்ட குடும்பத்தினர் குற்றம் சாட்டுகின்றனர். கடந்த சில மாதங்களில் ராஜஸ்தானில் பிரசவத்திற்குப் பிறகு 19-க்கும் மேற்பட்ட தாய்மார்கள் உயிரிழந்துள்ள சூழலில், இந்த விவகாரத்தின் தீவிரத்தைக் கருத்தில் கொண்டு டெல்லி மற்றும் ஜோத்பூர் எய்ம்ஸ் மருத்துவர்கள் அடங்கிய உயர்மட்டக் குழு அமைக்கப்பட்டு விரிவான விசாரணை நடத்தப்பட்டு வருகிறது.