காசு இல்லையா… கம்முனு இருங்க..! இஎம்ஐ-ல் பொருள் வாங்குவது தற்கொலைக்குச் சமம்..! வைரலாகும் விழிப்புணர்வு வீடியோ..!!!

தற்போதைய காலகட்டத்தில் வீடு, கார், விலையுயர்ந்த ஸ்மார்ட்போன்கள் போன்றவற்றை வாங்குவதற்குத் தேவையான கடன்களைப் பெறுவது மிகவும் எளிதாகிவிட்டது. முழுத் தொகையையும் ஒரே நேரத்தில் செலுத்த வேண்டியதில்லை என்பதால், ஆரம்பத்தில் இந்த சுலபத் தவணை முறை வசதியானதாகத் தோன்றுகிறது. ஆனால், இன்ஸ்டாகிராமில் ‘க்யா திக்கத் ஹை’ என்ற பக்கத்தில் அமித் என்பவர் பகிர்ந்த வீடியோ ஒன்று தற்போது சமூக ஊடகங்களில் பெரும் விவாதத்தை ஏற்படுத்தியுள்ளது. ஆடம்பரத்திற்காகவும், சமூக அந்தஸ்தைக் காட்டுவதற்காகவும் தங்களின் பொருளாதாரத் தகுதிக்கு மீறி கடன் வாங்கி இஎம்ஐ வலையில் சிக்குவது எதிர்காலத்தில் எவ்வளவு பெரிய ஆபத்தாக முடியும் என்பதை இந்த வீடியோ எளிய மொழியில் விளக்குகிறது.

நாம் வாங்கும் புதிய காரோ அல்லது விலையுயர்ந்த பொருளோ அன்றைய தினத்தில் குடும்பத்தினருக்கு மட்டற்ற மகிழ்ச்சியையும் பெருமையையும் தரலாம். ஆனால், அதற்கான தவணைத் தொகையைச் செலுத்த மாதந்தோறும் படும் அவதி அந்த மகிழ்ச்சியை சில நாட்களிலேயே பறித்து விடுகிறது. ஒவ்வொரு மாதமும் குறிப்பிட்ட தேதிக்குள் பணத்தைச் செலுத்த வேண்டுமே என்ற கவலை, மனிதர்களின் நிம்மதியைக் கெடுத்து தீவிர மன அழுத்தமாக மாறுகிறது. இதனால், வேலை செய்யும் இடத்தில் போதிய கவனம் செலுத்த முடியாமல் போவதுடன், வேலை இழப்பு அல்லது வருமானக் குறைவு ஏற்பட்டால் என்ன செய்வது என்ற பயத்துடனேயே வாழ வேண்டிய சூழ்நிலை உருவாகிறது. இது ஒருவருடைய சுயநம்பிக்கையையும், வாழ்க்கையை மகிழ்ச்சியாக வாழும் தன்மையையும் முற்றிலும் முடக்கிவிடுகிறது.

https://www.instagram.com/reel/DanrEoJpTuh/?utm_source=ig_web_button_share_sheet

ஒரு பொருளை உடனடியாக வாங்குவதற்குத் தற்போதைய சூழலில் நம்மிடம் பண வசதி இல்லை என்றால், கடனில் வாங்குவதை விட சில மாதங்களோ அல்லது சில வருடங்களோ காத்திருப்பது புத்திசாலித்தனமானது என்று இந்த வீடியோவில் அறிவுறுத்தப்பட்டுள்ளது. தேவைப்பட்டால் பழைய பொருட்களையே சில காலம் பயன்படுத்தலாம் அல்லது சிறுகச் சிறுகப் பணத்தைச் சேமித்து வைத்து, அதன் பிறகு முழுத் தொகையையும் கொடுத்து வாங்குவது எதிர்கால மன அமைதியை உறுதி செய்யும். இந்த வீடியோ சமூக வலைத்தளங்களில் வைரலானதைத் தொடர்ந்து, பல பயனர்கள் தங்களின் சொந்த அனுபவங்களைப் பகிர்ந்து, அவசரப்பட்டு கடன் வாங்கிவிட்டு இப்போது தவணை கட்ட முடியாமல் தவிப்பதாகக் கூறி அமித்தின் கருத்துக்களை ஆமோதித்து வருகின்றனர்.