திரையுலகை உலுக்கிய கொடூரம்!.. 18 வயதிலேயே ‘காட்ஸில்லா’ பட நடிகை விபத்தில் பலி… கலங்கி நிற்கும் ஹாலிவுட்..!!

ஹாலிவுட்டின் பிரம்மாண்ட தயாரிப்புகளான ‘காட்ஸில்லா வெர்சஸ் காங்’ மற்றும் அதன் தொடர்ச்சியான ‘தி நியூ எம்பயர்’ படங்களின் மூலம் உலகளவில் ரசிகர்களின் கவனத்தை ஈர்த்த மாற்றுத்திறனாளி நடிகை கெய்லி ஹாட்டில், அமெரிக்காவில் நடந்த கோரமான கார் விபத்தில் உயிரிழந்தார். மேரிலாண்ட் பகுதியில் அதிகாலை நேரத்தில் கட்டுப்பாட்டை இழந்த வாகனம் சாலையோர வடிகாலில் மோதி விபத்துக்குள்ளானதில், பலத்த காயமடைந்த அவர் மருத்துவமனை செல்லும் வழியிலேயே பரிதாபமாக உயிர் நீத்தார். அதிவேகமே இந்த விபத்துக்கு காரணம் எனத் தெரிவிக்கப்படும் சூழலில், அவரது தந்தை சைகை மொழி மூலம் கண்ணீருடன் இச்சம்பவத்தை உறுதிசெய்ததோடு, விபத்திற்குக் காரணமான ஓட்டுநரை மன்னித்துவிட்டதாகவும் உருக்கமாகத் தெரிவித்துள்ளார்.

2021-இல் அறிமுகமாகி, கிங் காங் மிருகத்துடன் சைகை மொழியில் பேசி நட்பை வெளிப்படுத்தும் ‘ஜியா’ கதாபாத்திரத்தின் மூலம் உலகம் முழுவதிலும் உள்ள ரசிகர்களைக் கவர்ந்த கெய்லி, மாற்றுத்திறனாளிகளுக்கான முக்கிய அடையாளமாகத் திகழ்ந்தார். 2024-இல் வெளியான இரண்டாம் பாகத்திற்காகச் சிறந்த இளம் நடிகருக்கான ‘சாட்டர்ன் விருது’ பரிந்துரையையும் பெற்ற இவர், இளம் வயதிலேயே ஹாலிவுட்டில் தனக்கென தனிமுத்திரை பதித்திருந்தார். இவரது மறைவுக்கு மில்லி பாபி பிரவுன், அலெக்சாண்டர் ஸ்கார்ஸ்கார்ட், ரெபெக்கா ஹால் உள்ளிட்ட பிரபல ஹாலிவுட் நட்சத்திரங்களும், அவர் பயின்ற பள்ளியும் ஆழ்ந்த இரங்கலைத் தெரிவித்துள்ளனர்.