“என் பையன் மட்டுமில்ல… எந்தக் குழந்தையும் இனி படிக்காம இருக்கக்கூடாது..!” மாற்றுத்திறனாளி மகனுக்காகத் கண்டுபிடித்த ‘சிறப்பு நாற்காலி’…! குடியரசு தலைவரிடம் விருது வாங்கும் தாயின் மகத்தான சாதனை…!!

ராஜஸ்தானின் பாலியைச் சேர்ந்த உளவியலாளரான நேஹா சோலங்கி, மூளை முடக்குவாதத்தால் பாதிக்கப்பட்ட தனது மகனைப் பள்ளியில் சேர்க்க முயன்றபோது கடும் சவால்களை எதிர்நோக்கினார். வழக்கமான பள்ளிகளில் இத்தகைய சிறப்புத் தேவைகள் கொண்ட குழந்தைகளுக்கான போதிய அமரும் வசதிகள் இல்லாததால் அவருக்குச் சேர்க்கை மறுக்கப்பட்டது. இதைக் கண்டு சோர்ந்துபோகாத அவர், தனது மகனுக்காக மட்டுமன்றி இதேபோன்று சிரமப்படும் பிற குழந்தைகளுக்காகவும் ஒரு தீர்வைக் கண்டறிய முடிவெடுத்தார். பிசியோதெரபிஸ்ட்கள் மற்றும் மருத்துவ நிபுணர்களின் ஆலோசனையுடன், மூளை முடக்குவாதத்தால் பாதிக்கப்பட்ட குழந்தைகளுக்காக ‘ அடாப்டிவ் சீட்டிங் சிஸ்டம்‘ எனும் சிறப்பு நாற்காலி அமைப்பை நேஹா வடிவமைத்தார். இந்தச் சிறப்பு நாற்காலி, குழந்தைகள் நிமிர்ந்து அமரவும், உடலின் சீரான நிலையைப் பராமரிக்கவும் மிகவும் பாதுகாப்பான முறையில் உருவாக்கப்பட்டுள்ளது.

இந்த கண்டுபிடிப்பு 3 முதல் 12 வயது வரையிலான குழந்தைகளுக்குப் பெரும் உதவியாக உள்ளது. இதன் மூலம் குழந்தைகள் வகுப்பறையில் பிறரின் உதவியின்றி சுதந்திரமாக அமர்ந்து படிக்கவும், எழுதவும், உணவு உண்ணவும் முடிகிறது. இது அவர்களின் தன்னம்பிக்கையை அதிகரிப்பதோடு, சாதாரண வகுப்பறைகளில் அவர்கள் தடையின்றிப் பயிலவும் வழிகோலுகிறது. விலையுயர்ந்த இறக்குமதி சாதனங்களுக்கு மாற்றாக, உள்ளூரிலேயே கிடைக்கும் தரமான பொருட்களைக் கொண்டு மிகக் குறைந்த செலவில் இந்த நாற்காலி தயாரிக்கப்பட்டுள்ளது. இதனால் ஏழை மற்றும் நடுத்தர குடும்பங்களைச் சேர்ந்த சிறப்புக் குழந்தைகளும் இந்த வசதியைப் எளிதாகப் பெற முடிகிறது.

நேஹா சோலங்கியின் இந்தச் சமூகப் புதுமையைப் பாராட்டி, நிதி ஆயோக்கின் ‘அடல் இன்னோவேஷன் மிஷன் ‘ இவரை ‘கிராஸ்ரூட்ஸ் இன்னோவேட்டர் ரிகக்னிஷன் 2026‘ விருதுக்குத் தேர்ந்தெடுத்துள்ளது. இவரின் இந்த எளிய கண்டுபிடிப்பு பல சிறப்புக் குழந்தைகளின் கல்விக்கும் வளர்ச்சிக்கும் கதவுகளைத் திறந்துவிட்டுள்ளது. புதுடெல்லியில் நடைபெறவுள்ள பிரம்மாண்ட விழாவில், இந்தியக் குடியரசுத் தலைவர் திரௌபதி முர்மு கரங்களால் நேஹா சோலங்கி இந்த உயரிய விருதைப் பெறவுள்ளார். தனது சொந்த வாழ்க்கைப் போராட்டத்திலிருந்து சமூகத்திற்கான மகத்தான கண்டுபிடிப்பை உருவாக்கிய இவரின் சாதனை பாலி மாவட்டத்திற்கும் ராஜஸ்தான் மாநிலத்திற்கும் பெருமை சேர்த்துள்ளது.