“90 பிளஸிலும் ஃபிட்னஸ் கிங்… தோல்வியே தொடாத மன உறுதி…! கலைஞரின் இரும்பாலான உடல்நலனுக்குப் பின்னால் இருக்கும் சீக்ரெட் இதுதானா..!!

மறைந்த தமிழ்நாட்டின் முன்னாள் முதலமைச்சர் மற்றும் திமுகவின் மூத்த தலைவருமான கலைஞர் கருணாநிதி அவர்களின் வாழ்க்கை, நீண்ட காலம் ஆரோக்கியமாக வாழ விரும்புபவர்களுக்கு ஒரு சிறந்த எடுத்துக்காட்டாகும். 90 வயதைக் கடந்தும் நல்ல நினைவாற்றலுடனும் சுறுசுறுப்புடனும் திகழ்ந்த அவர், 85 வயது வரை தினமும் தவறாமல் உடற்பயிற்சிகளைச் செய்து வந்தார். தேர்தலில் எத்தனை தோல்விகள் வந்தாலும் துவண்டு போகாமல், மீண்டும் முதலிலிருந்து தொடங்கும் மன உறுதியை அவர் பெற்றிருந்தார். இதற்கு அவர் கடைப்பிடித்த எளிய உணவுமுறையும், யோகா மற்றும் மன உறுதிக்கான பயிற்சிகளுமே முக்கியக் காரணங்களாக அமைந்தன.

உணவுமுறையைப் பொறுத்தவரை, காலையில் இட்லி, மதியம் சாம்பார் சாதத்துடன் காய்கறி மற்றும் கீரை, மாலையில் தோசை போன்ற எளிதில் செரிக்கக்கூடிய எளிய உணவுகளையே அவர் உட்கொண்டார். பழங்களில் ஆப்பிளை அதிகம் விரும்பிச் சாப்பிட்டவர், வயதிற்கு ஏற்றவாறு தன் உணவுப் பழக்கத்தை மாற்றிக்கொண்டார். உணவை ஒரே நேரத்தில் அதிகளவு உண்ணாமல், ஒருநாளுக்கு 4 முதல் 5 முறை எனப் பிரித்து மிகக் குறைந்த அளவே சாப்பிட்டார். இரத்த சர்க்கரை அளவைச் சீராக வைக்கவும், செரிமானத்தை எளிதாக்கவும், நாள் முழுவதும் ஆற்றலுடன் இருக்கவும் இந்த உணவுப் பழக்கம் அவருக்குப் பெரிதும் உதவியது.

உணவுக் கட்டுப்பாட்டோடு உடற்பயிற்சியிலும் அவர் தீவிர கவனம் செலுத்தினார். 2009-ஆம் ஆண்டு முதுகுப் பகுதி அறுவை சிகிச்சை நடக்கும் வரை, தினமும் குறைந்தது 1 மணி நேரம் நடைப்பயிற்சி செய்வதை வழக்கமாகக் கொண்டிருந்தார். யோகா கலை வல்லுநர் தேசிகாச்சாரி என்பவரிடம் யோகாவைக் கற்றுக்கொண்ட அவர், தினமும் அதிகாலையில் யோகா, மூச்சுப்பயிற்சி மற்றும் தியானம் செய்வதாகக் குறிப்பிட்டுள்ளார். இந்தப் பயிற்சிகளே அவரது சிந்தனை ஓட்டத்தைக் கூர்மையாக்கி, உடல் மற்றும் மனத் திறன்களை வளர்த்தன. இதன் காரணமாகவே, முதுமையிலும் நல்ல நினைவாற்றலுடனும் புத்துணர்ச்சியுடனும் அவரால் வாழ முடிந்தது.