“நான் குற்றவாளி அல்ல..! கணவர் கடைக்குச் சென்ற 20 நிமிடத்தில் நடந்த கொடூரம்..! 3 குழந்தைகளைக் கொன்ற தாய் நீதிமன்றத்தில் கதறல்..! பின்னணியில் இருக்கும் திடுக்கிடும் உண்மை..!!

அமெரிக்காவின் மசாசூசெட்ஸ் மாகாணத்திலுள்ள டக்ஸ்பரியைச் சேர்ந்த முன்னாள் பிரசவப் பிரிவு செவிலியரான லிண்ட்சே கிளான்சி, 2023-ஆம் ஆண்டு ஜனவரி மாதம் தனது மூன்று குழந்தைகளான கோரா, டாசன், மற்றும் காலன் ஆகியோரை நெரித்துக் கொன்றதாக குற்றம் சாட்டப்பட்டுள்ளார். இச்சம்பவத்தின் போது கிளான்சியின் கணவர் பேட்ரிக் உணவு மற்றும் மருந்துகள் வாங்க வெளியே சென்றிருந்த நிலையில், கிளான்சி உடற்பயிற்சிக்கு பயன்படுத்தும் பட்டை மூலம் இக்கொலைகளைச் செய்ததாக அரசுத் தரப்பு தெரிவிக்கிறது. அதன் பிறகு கிளான்சி ஜன்னல் வழியே குதித்து தற்கொலைக்கு முயன்றதில், அவரது முதுகுத்தண்டில் பலத்த காயங்கள் ஏற்பட்டு இடுப்புக்கு கீழே செயலிழந்து சக்கர நாற்காலியைப் பயன்படுத்தும் நிலைக்குத் தள்ளப்பட்டார். நீதிமன்ற விசாரணையின் போது, தன் மீதான குற்றச்சாட்டை அவர் மறுத்து “குற்றவாளி இல்லை” என்று வாதாடியுள்ளார்.

கிளான்சி தரப்பு வழக்கறிஞர்கள் குழந்தைகள் உயிரிழந்ததை மறுக்கவில்லை; மாறாக, பிரசவத்திற்குப் பிந்தைய மனநோய் மற்றும் பைபோலார் கோளாறு ஆகிய தீவிர மனநலப் பிரச்சினைகளால் அவர் பாதிக்கப்பட்டிருந்ததாக வாதிடுகின்றனர். இந்த நோயின் காரணமாகவே அவர் எதார்த்த உணர்வை இழந்து இச்செயலைச் செய்ததாகவும், இதனால் அவர் மீது குற்றவியல் பொறுப்பு சுமத்த முடியாது என்றும் கூறுகின்றனர். மேலும், இச்சம்பவத்திற்கு முன்பாக அவர் அவசர சிகிச்சை மையங்கள், மனநல மருத்துவர்கள் மற்றும் மருத்துவமனைகளை நாடி தொடர் சிகிச்சைகளையும், பல்வேறு மனநல மருந்துகளையும் உட்கொண்டு வந்ததாகவும் அவரது நாட்குறிப்புகளும் மருத்துவச் சான்றுகளும் தெரிவிக்கின்றன.

அரசுத் தரப்பு வழக்கறிஞர்கள் இதனை முற்றிலுமாக மறுத்து, கிளான்சி திட்டமிட்டே தனது கணவரை வெளியே அனுப்பிவிட்டு குழந்தைகளைக் கொல்லும் சூழலை உருவாக்கினார் என்று குற்றம் சாட்டுகின்றனர். அவரது மின்னணு சாதனங்கள் மற்றும் சம்பவத்தின் போது இருந்த சூழ்நிலைகளை வைத்து அவர் உணர்வுபூர்வமாகவே திட்டமிட்டு இக்கொலைகளைச் செய்துள்ளார் என்பது அரசுத் தரப்பின் வாதமாகும். இந்த வழக்கில் முதல்நிலை கொலைக் குற்றம் நிரூபிக்கப்பட்டால் கிளான்சிக்கு பிணையில்லா ஆயுள் தண்டனை கிடைக்கக்கூடும். ஒருவேளை மனநலக் கோளாறு காரணமாக அவர் குற்றவாளி அல்ல எனத் தீர்ப்பளிக்கப்பட்டால், அவர் உடனடியாக விடுவிக்கப்படாமல், அரசின் தீவிர மனநலக் காப்பகத்தில் அடைக்கப்பட்டு தொடர் சிகிச்சைக்கு உட்படுத்தப்படுவார்.