“தீபாவளி ஆட்டத்தில் த்ரில் வெற்றி..” இந்தியாவை வீழ்த்தி மாஸ் காட்டிய பாகிஸ்தான் வீரரின் வெறித்தனமான கொண்டாட்டம்… வைரல் வீடியோ..!!

ஞாயிற்றுக்கிழமை ஓமனில் உள்ள அல் அமேரத் கிரிக்கெட் மைதானத்தில் நடைபெற்ற 19 வயதுக்குட்பட்டோருக்கான ஆசிய கோப்பை கிரிக்கெட் தொடரின் ‘ஏ’ பிரிவு போட்டியில், இந்தியாவுக்கு எதிரான பரபரப்பான ஆட்டத்தில் பாகிஸ்தான் அணி 3 விக்கெட்டுகள் வித்தியாசத்தில் த்ரில் வெற்றி பெற்றது. தீபாவளி திருநாளில் நடந்த இப்போட்டியில் பாகிஸ்தான் இளம் வீரர்கள் தங்களது பரம எதிரியான இந்தியாவை வீழ்த்தியதை அடுத்து மைதானத்தில் வெறித்தனமான மற்றும் உற்சாகமான கொண்டாட்டங்களில் ஈடுபட்டனர். இந்திய அணி நிர்ணயித்த 209 ரன்கள் என்ற இலக்கை நோக்கி களமிறங்கிய பாகிஸ்தான் அணி ஆரம்பத்தில் அடுத்தடுத்து விக்கெட்டுகளை இழந்து 61 ரன்களுக்கு 5 விக்கெட்டுகளை இழந்து தடுமாறியது.

இந்த இக்கட்டான கட்டத்தில் களமிறங்கிய விக்கெட் கீப்பர் பேட்ஸ்மேனான ஹம்சா ஜஹூர் அணியை சரிவிலிருந்து மீட்டு அற்புதமாக விளையாடினார். அவர் 108 பந்துகளில் ஆட்டமிழக்காமல் 100 ரன்கள் அடித்து, இன்னும் 11 பந்துகள் மீதமிருக்க பாகிஸ்தானை வெற்றிப் பாதைக்கு அழைத்துச் சென்றார். தனது சதத்தை நிறைவு செய்த பவுண்டரியை அடித்தவுடன் ஹம்சா ஜஹூர் எல்லை மீறிய உற்சாகத்தில் துள்ளிக்குதித்து கொண்டாடினார். அவருடன் களத்தில் இருந்த மறுமுனை வீரர் நிகாப் ஷாபிக்கும் தனது மட்டையைக் கீழே வீசிவிட்டு, ஓடிச்சென்று ஹம்சாவை இறுகக் கட்டியணைத்து தனது மகிழ்ச்சியை வெளிப்படுத்தினார்.

முன்னதாக, இப்போட்டிக்கு முன்பாகவே ஹம்சா ஜஹூர் தான் சிறப்பான ஆட்டத்தை வெளிப்படுத்தப் போவதாகக் குறிப்பிட்டு எழுதியிருந்த கையெழுத்துப் பிரதி சமூக வலைதளங்களில் வைரலாகி அனைவரின் கவனத்தையும் ஈர்த்தது. இந்திய அணியின் சார்பில் அர்ஜுன் ராஜ்புத் 107 ரன்கள் எடுத்தும், பந்துவீச்சாளர்களான அலி ரசா, ரிஸ்வானுல்லா மற்றும் நிகாப் ஷாபிக் ஆகியோர் தலா 3 விக்கெட்டுகளை வீழ்த்தி இந்தியாவை 208 ரன்களுக்கு சுருட்டினர். எனினும், ஹம்சா ஜஹூரின் அபார சதமும், ஹஸ்னைன் அப்பாஸ் தாருடன் (38 ரன்கள்) ஏற்பட்ட முக்கிய ஜோடியும் பாகிஸ்தானுக்கு இந்த வரலாற்றுச் சிறப்புமிக்க வெற்றியைப் பெற்றுக்கொடுத்தது.