நெஞ்சை உலுக்கும் சோகம்..! திசைமாறி மார்பில் பாய்ந்து வெடித்த ராக்கெட் பட்டாசு… தீபாவளி கொண்டாட்டத்தின் போது 10 வயது சிறுவன் பரிதாப பலி..!!

டெல்லியில் தீபாவளி பண்டிகைக் கொண்டாட்டத்தின் போது நேரிட்ட பட்டாசு விபத்தில், 10 வயது சிறுவன் ஒருவன் அவனது மார்புப் பகுதியில் பட்டாசு பாய்ந்து வெடித்ததில் பரிதாபமாக உயிரிழந்துள்ளான். ஞாயிற்றுக்கிழமை இரவு ரிஷி என்ற அந்தச் சிறுவன் தனது குடும்பத்தினருடன் சேர்ந்து பட்டாசு வெடித்துக் கொண்டிருந்த போது இந்தத் துயரச் சம்பவம் நிகழ்ந்துள்ளது. வானத்தை நோக்கிச் செல்ல வேண்டிய ராக்கெட் வகை பட்டாசு ஒன்று எதிர்பாராத விதமாகத் திசைமாறிச் சிறுவனின் மார்பில் பலமாக மோதி வெடித்ததால் அவன் நிலைகுலைந்து கீழே விழுந்துள்ளான்.

விபத்தால் அதிர்ச்சியடைந்த குடும்பத்தினர் சிறுவனை மீட்டு நரேலாவில் உள்ள சத்யவாதி ராஜா ஹரிஷ் சந்திரா அரசு மருத்துவமனைக்குக் கொண்டு சென்றுள்ளனர். ஆனால், அங்குச் சிறுவனைப் பரிசோதித்த மருத்துவர்கள் அவன் ஏற்கனவே உயிரிழந்துவிட்டதாகத் தெரிவித்துள்ளனர். எனினும், மருத்துவமனைக்கு அழைத்துச் சென்றபோது சிறுவன் உயிருடன் இருந்ததாகவும், மருத்துவர்கள் உரிய நேரத்தில் அவசரமாகச் செயல்பட்டுத் தீவிர சிகிச்சை அளிக்காததே அவனது மரணத்திற்குச் காரணம் என்றும் சிறுவனின் தாயார் மற்றும் அண்ணன் ஆகியோர் மருத்துவ அலட்சியக் குற்றச்சாட்டுகளை முன்வைத்துள்ளனர்.

டெல்லியில் இந்த ஆண்டுத் தீபாவளி நாளில் மட்டும் தீயணைப்புத் துறைக்கு 257 அவசர அழைப்புகள் வந்துள்ளதாகவும், அதில் பெரும்பாலானவை தீ விபத்துகள் தொடர்பானவை என்றும் தெரிவிக்கப்பட்டுள்ளது. இந்த விபத்துகள் மற்றும் மீட்புப் பணிகளின் போது ஐந்து தீயணைப்பு வீரர்களும் காயமடைந்துள்ளனர். பண்டிகைக் காலங்களில் குழந்தைகள் பட்டாசு வெடிக்கும் போது பெரியவர்கள் அருகில் இருந்து கண்காணிக்க வேண்டும் என்றும், சிறிய கவனக்குறைவு பெரிய இழப்பை ஏற்படுத்திவிடும் என்றும் இந்தச் சோகச் சம்பவத்தின் பின்னணியில் அறிவுறுத்தப்பட்டுள்ளது.